لو إنّك يا سعد شفت الّلحالي

[اللحالي]

اللحالي الغيداني

لو إنّك يا سعد شفت الّلحالي يومنّه يسمع الشّيله تشالي=تذكّر ما مضى له من ليالي زمانٍ مقفيه عنّا رحاله
​​ ‎ ‎‎ ‎ ‎ = ‎ ‎ ‎
سمعت الّلي لنا العمري يقوله عن الماضي وصابتني ملوله=من الحاضر ولا أدري وش أقوله غير إنّي شفت في حالي ملاله
​​ ‎ ‎‎ ‎ ‎ = ‎ ‎ ‎
على كثر النِّعم والأمن سايد وعلمٍ منه يا كثر الفوايد=ولكن هاجس الأفكار زايد على المقدور مطبقةٍ جباله
​​ ‎ ‎‎ ‎ ‎ = ‎ ‎ ‎
ولكن يا سعد بالله رجانا يصبّرنا ويكفينا الهوانا=وينصرنا على دحرة أعدانا عسى الله ما يخيّبنا سؤاله

‎ ‎‎ ‎ ‎ = ‎ ‎ ‎
‎ ‎‎ ‎ ‎ = ‎ ‎ ‎

ردّ سعد السّمين

ألا يا مرحبا بك ياللحالي عدد ما رحّب الغالي بغالي=وعدد رشّ المطر فوق الجبالي وعدد من هو شكى لله حاله
 ‎ ‎‎ ‎ ‎ = ‎ ‎ ‎
أنا والله ما كنت أشوفك كلامك أمس بيّن لي شعورك=وشفت الحزن واضح في حروفك وغصّة من تذكّر ما مضى له
 ‎ ‎‎ ‎ ‎ = ‎ ‎ ‎
أكيد الوقت متغيّر ميوله ويزعجنا بصراحة ما نشوفه=تغيّر مجتمعنا يا حسوفه وعقوق الأهل هي أكبر دلاله
 ‎ ‎‎ ‎ ‎ = ‎ ‎ ‎
ومن أكبر مشاكلنا التّباعد وضعف الدّين ونسيان العوايد=طبيعي نصير مطمع كلّ حاقد علينا خطّته فرض احتلاله
 ‎ ‎‎ ‎ ‎ = ‎ ‎ ‎
ولكن بالسماء ربّ يحمينا ونرفع له ليا ضقنا يدينا=ويسمعنا ليا منّا دعينا على عبده رحيم ليا التجى له
‎ ‎‎ ‎ ‎=‎ ‎ ‎
‎ ‎‎ ‎ ‎=‎ ‎ ‎