موخرها ابهام - للشاعر لافي حمود الغيداني

[اللحالي]

مـايـبـرد واهـــج الـشــوق وشـعــور الـهـيـام=غيـر سـرداً تـطـوي البـعـد بالسـرعـه طــوي
بديهـا مـن خـلـف مـاهـوب مثـلـه مــن امــام=مستـوي فـي حـال .. وبحـال ماهـو مسـتـوي
خشمـهـا عـبـرود طلـقـه .. وموخـرهـا بـهـام=رافــعـــه راعــيـــه بـــأشـــارة ٍ مـاتـنــغــوي
لابـدو دعـاء السفـر .. واعلـنـو ربــط الـحـزام=ورشــادات الامــن لــو تـرتـطـم والا تـهــوي
واستلمـهـا واحــد ٍ خـبـرتـه عـشـريـن عـــام=كـبــتــن ٍ بالله وبـكـتـابــه إيـمــانــه قـــــوي
مـسـلـم ٍ عـنــده خـبــر بـالـحـلال وبـالـحـرام=جابـلـه ربــي عـلـى الـديـن وسلـوكـه ســوي
وصعدت مثل اشقـر ٍ فـوق جـول الصيـد حـام=لـمـراوحـهـا مــــع الــجــو لــجــه وحــــدوي
مثـل مـايـدوي صــدى صــوت رعــاد الغـمـام=صـوتـهـا صـــداه عـبــر الـفـضـا يـــدوي دوي
صنـعـة الـلـي مـاعـرفـوا لاصـــلاة ولاصـيــام=شـعـب ٍ أكثـرهـم مـاهـو عــارف ٍ منـهـو ذوي
بالـنـهـار لياتـعـلـت كــبــر فــــرخ الـحـمــام=دونــهـــا الاف الـمـسـافــات تـزويــهــا زوي
وان تغطلـس بيـنـك وبـيـن رؤيتـهـا الـظـلام=كــن فــي روس اجنحتـهـا مشاهـيـب بــدوي
دوبـهـم دكــو عــن دلالـــه الـربــع الـحـشـام=تحتـهـا مــن وقــدة السـمـر جـمـر ٍ مـجـثـوي
دايــم وربـعـه عـلـى جـلـسـة ٍ عـنــده حـيــام=ابــلــج ٍ لــيــن جـنـابــه لـربــعــه وحــمـــوي
مـالـي الا هــي .. لـيـاجـا لـلاشــواق أحـتــدام=وقامـت الذكـرى علـى القلـب تكوينـي كـوي
لـي شهـر وشــوي عيـنـي محاربـهـا المـنـام=ودي احــضــر جــــوازي وادورلــــي خـــــوي
بيـنـي وبـيـنـه مـسـافـات وحـــدود ونـظــام=واحـــد ٍ فـرقــاه شـاويـتـن فـــوادي شــــوي
بــس ابـــا ازوره مـثــل مـايــزارون الـكــرام=لـيـن عيـنـي مــن قـبـالـه وشـوفــه تـرتــوي
لو بغيـت اصبـر .. واكابـر .. واقـول انـي تمـام=ذيــب حـبـه بـيــن جـــرد المـحـاديـب يـعــوي
كـان مالـي فــي دروب الـهـوا شــف ومــرام=ليـن شفتـه .. واشـهـد انــه هــواة المهـتـوي
يـاسـلام الله عـلــى السلـهـمـه والابـتـسـام=وياسـلام الله علـى الـلـي مابيـلـه مـطـروي
كـن مالله حـط فـي منطقـة خـصـره عـظـام=وكـن غـيـره ماحـتـوى مـثـل مـاهـو محـتـوي
لاقـعــد مـــاوده يــقــوم .. ولـيـاقــام قــــام=تـلـوي اعـنـاق البـشـر قـومـتـه يـمــه لـــوي
تقل بين اعلا الجسم واسفل الجسم انقسام=شـي مــن جسـمـه مـرتـب وشــي ٍ فـوضـوي
استلـمـنـي فـــي جـبـروتـه اشـــر اســتــلام=لــيــن طــيّــح مـعـنـويـات راس الـمـعـنــوي
الـغـرام ليابـطـش فـيــك مـلـعـون الـرســام=مـايـعـرف هـــذا قبـيـلـي .. وهـــذاك خـلــوي
يكـبـر الـرجــال امـــام المـهـمـات الـجـسـام=ويصـغـر الـرجـال امـــام الـجـمـال الانـثــوي
مايتحـمـل نـظـرة العـيـن .. وارخــاي اللـثـام=لــو بـاسـه بــاس رحـمـة حـيـاة بــن جـلــوي

[معيض الضعيني]

صح السان لافي وسلم اللحالي يعني الله لايحرمنا منكم يا الغيادين

اللحالي الغيداني معجب بهذا

[اللحالي]

ابو وليد الله يرفع قدرك ويعلّي شانك انت ومثالك يابن العم
الله يمد بعمرك على طاعته انّه جوادٍ كريم