عطني جوابك

[اللحالي]

أرسل الشّاعر عويّض محمّد الغيداني

يـــا مـــن يـوصّــل لـــي سـلامــي ومـكـتـوب=مـكـتــوب أبــيــض مــــن بــيــاض الـوريـقــي

لــجــزّاع أمــانــه يــــا بــعــد كــــلّ مــنـــدوب=ريـــــف الـرّفــيــق وبـالـمـعـانــي غـمـيــقــي

شـبــلٍ مـــن الأبـطــال وافــــي ومـحـســوب=زيــــزوم طــيــب ولــلـــرّدى مـــــا يـطـيـقــي

ودّي مــعــه آخــــذ مــــن الــبــنّ مــشـــروب=فــــي جـلـســةٍ تــجــلا هــمــوم الـعـزيـقــي

الــوصــل مــــا بــيـــن الـقـريـبـيـن مــاجـــوب=لــكــن ظــــروف الــوقــت دونـــــه تـعـيـقــي

نـــوبٍ مــــع الـبـدلــه ونــــوبٍ مــــع الــثــوب=نِـشْـبِـه لـقــوسٍ بـيــن خـمــس المُـسـيـقـي

لا شـــكّ أبـزهــم صـاحـبـي عــبــر مـنـجــوب=وأبسـئـلـه ســـؤال فــــي ســــاق سـيـقــي

خلّـيـت مفـهـومـه عـلــى الـسّـطـر مـنـصـوب=قـــــافٍ يــعــبّــر عــــــن كــــــلامٍ رقــيــقــي

أبـاطــرح الــسّــؤال فــــي هــــدوّ واســلــوب=عــن شـــيّ صـادفـتـه وأنـــا فـــي طـريـقـي

شـكـلـه مـخـيـف وبـيــن الأطـــراف مـطـلـوب=هـــــذا حـــريـــب وذاك لــجــلــه شـفـيــقــي

اســمــه وعـنـوانــه بــالأقـــواس مـنــســوب=عــنــد الـخـبـيـر ولا لـــــه اســـــمٍ حـقـيـقــي

عــرّض وقـــال أنّـــي عـلـيـك أنـــت مـجـلـوب=هــديّــةٍ يـــــا ذا الـبــشــر مـــــن صـديــقــي

وغـرّتـنـي السّـنـحـه عـلــى فــــخّ مـنـصــوب=وسـمّـيــت بــاســم الله وأصــبـــح رفـيــقــي

أصـبَــح عـقــب بـغـضـه حـشـيــمٍ ومـحـبــوب=والـنّــفــس مـــــن فــرقـــاه لازم تـضـيــقــي

فــي حضـرتـه يـانــس لـــه الـقـلـب بـطــروب=وفـــي غيـبـتـه قـلــب الـعـنــا مــــا يـفـيـقـي

وكـم كاسـبٍ يـرجـى الطـمـع مـنـه مكـسـوب=وكـــــم واحـــــدٍ ولّـــــع بــصـــدره حـريــقــي

تــاريـــخ صـدفـتــنــا مــهــجَّــر ومــحــســوب=خـمـســة عــشــر عــــامٍ بـحـبّــه غـريــقــي

قضـيـتـهـا ويّــــاه فــــي شــغـــب وحـــــروب=ولا ودّي أكــشــف ســــرّ كــونـــه عـمـيـقــي

لـمّـحــت لــــك تـلـمـيـح والـعــلــم مــكـــروب=مــــن بـيـنـنـا عــــن كــــلّ خــبــلٍ طـفـيـقـي

خــلّـــه كــمـــا زارك بــالأقـــواس مـصــبــوب=لــو حــدّك المـعـنـا عـلــى أشـــرف طـويـقـي

وأنـــــت الـفـهـيــم وبـالـتـمـاثـيـل مـــوهـــوب=شـــاعـــر ولا تــحــتــاج شــــــرحٍ طـلـيــقــي

عـطـنـي جـوابــك عـــن صـواديــف مـسـبـوب=تــــرى النّـصـيـحـه مــــن طـرفـكــم تـلـيـقـي
‎ ‎‎ ‎ ‎ = ‎ ‎ ‎
‎ ‎‎ ‎ ‎ = ‎ ‎ ‎

ردّ اللحالي الغيداني

حــــيّ الــجــواب الّــلــي لــجــزّاع مـجــيــوب=يـحــمــل بـصـفـحـاتـه قــوافـــي شـقـيـقــي

أهــلا هـــلا بـــه عـــد مـــا سـالــت شـعــوب=مـــن نـاشـيــن بـالـكــاف والــنّــون سـيـقــي

جــــواب مــــن يــرســـل وافــيـــه بــالـــدّوب=يـقـطــف مــــن الأزهــــار حــلــو الـرّحـيـقــي

فـكــر الـسّـنــع فــكــره وبـالـفـكـر مــجــذوب=مـــاهـــوب تـــــــوّه لـلـسّـنــايــع لـفــيــقــي

تـعـبـيـر مـــــن واقـــــع وبـالــرّمــز مـلــعــوب=بـالـفـكــر لـلـمـقـصـود يــخــفــق خـفـيــقــي

ويـــلــــفّ لـــفّــــات الـهــبــايــب لـــدالــــوب=ومـــع شـايـلـن لـلـحـمـل حــــطّ الـوسـيـقـي

يـالـفــاهــم بــلــيّــاي فــــــي عــــــدّة دروب=أنــــا عـــــن الأســنـــاع دربـــــي شـلـيـقــي

هـــذا وأنــــا بــقــول كــــان أنــــت مـصـيــوب=بــبــيــض بـــيــــاضٍ بـالـخـفــايــا يــويــقـــي

لا تـحـسـب أنّــــه بـالـخـفـا يـقـضــي الــنّــوب=تـــــراه مـهــمــا كـــــان وصــفـــه عـلـيــقــي

لــو كــان لــه فــي بـعـض الأوقــات سلـهـوب=يـقـفـاه وقـــت لـمــن طـمــع بــــه عـويـقــي

مــا لــك ومــال الّـلـي بـعـد سـهـلـه نـشــوب=يــثّــر بــخـــام الـصّــلــب كــثـــر الـطّـقـيـقـي

أعــرض ولــو جـــا لـــك مـنــه شـبــه نـاتــوب=أنـــت تـعــرف مـــن فـــي بـيـاضـه وهـيـقــي

أبـاصـفـه فــــي وصــــف مــــن دوّر ذهــــوب=يـنـقــل عــصــاه ومــــن فــريـــق لـفـريـقــي

مـتـشــتّــتٍ فـــكـــره وبــالــصّــدر لاهــــــوب=ومـــن مـــا بـصــدره صـــار خـلـقـه حمـيـقـي

يــجــول بــيــن الّــلــي مـريـفـيـن بـعشـــوب=ومــن شـــاف زولـــه قـــال جـاكــم طـريـقـي

ذا وصـــف وصّـفـتـه عـلــى شـبــه مـقـلــوب=وأنــــا مــذاقـــي مـــــع مــذاقـــك ذويــقـــي

لـــــو صـــــار ذا نــائـــب وهـــــذاك مـنــيــوب=ويــــن الــوزيـــر الّــلـــي مــزاجـــه رويــقـــي

وحـنّــا نــــدوّر كــســب والـكـســب مـنـهــوب=صـــدّر بـــه الّــلــي فــــي لـغـاتــه عـريـقــي

يـنــزف مـــن الـجـمّـه عـلــى عـــدّة غــــروب=وحــنّــا مــــن الـجـمّــه شـلـقـنــا الـبـريـقــي

وشلـون نرضـى الحـال فــي وصــف مـرعـوب=وحـــنّــــا بــعــقـــلٍ بـالـقـنــاعــه وثــيـــقـــي

يـصـيــر لــــه صــدفــات بـفـيــاض ودعـــــوب=مــيــر الــبــلا شــعــفٍ لـصـوتــه شـعـيـقــي

ونبـغـي مـثـل قـولــك مـــن الـبــنّ مـشــروب=والّـــلـــي مـــشـــا حـــنّـــا وراه بـلـحـيــقــي
‎ ‎‎ ‎ ‎ = ‎ ‎ ‎
‎ ‎‎ ‎ ‎ = ‎ ‎ ‎