06-23-2014, 09:55 PM
|
#1 |
|
مالك الموقع
تاريخ التسجيل: May 2014
المشاركات: 6,555
|
الألفيّة
كتب ناصر الشميلاني الألف أبكتب وابتدي في كلامي=وابدى بذكر الله رفيع المقامي رب السماء والارض منشي الغمامي=الخالق اللّي كوّن الكون وانشاه وابدي تراحيبي لمن يسمعوني=يامرحبا ترحيبةٍ ماتهوني من خاطرٍ مخلص وقلبٍ حنوني=بالمجتمع كلّه من اقصاه لدناه والباء بديت بعاليات الشواهيق=وبدعت من حلو المثايل طواريق والشعر وهبه يالرّجال وتوافيق=وهوايتي والقلب يطرب لمعناه وحبكتلي جملة بيوتٍ ولا باس=ورسمت معناهن بحكمه ومقياس وبنياً بنيته واثق انّه على ساس=جودت ساسه لين عزّزت مبناه والتاء ترى للهرج حكم وقوانين=وترى العوارف كلهم عنه دارين ويالله عسانا راجحين الموازين=في ساعةٍ مابع عشيره ولا جاه ويالله عسانا دايماً في سعاده=وانك تعزّ الدين واهل القياده اللّي لوجهك مخلصين العباده=وبالآخره كلاً كتابه بيمناه والثاء ثبات القول حجه وبرهان=والباقي الله وانت تفنى يالانسان لك الأجل محتوم ينزل ليا حان=لكن طيع الله ثم اتبع ارضاه واذا تبعت امره وسلّمْت وامنت=تراك من كل الفضايل تمكنّت وسلمت من كل الفتن ثم تحصّنت=وعطاك ربي من فضايل عطاياه والجيم جارك لاتناسى حقوقه=واسمحله الزّلات واستر فتوقه وخلّك معه وافي وحذرا تبوقه=ترا النبي جبريل حثّه ووصّاه ومن باق جاره لاتعدّه سعيدي=هذاك عن درب السعاده بعيدي لنـّه تعرض للوعيد الشديدي=واللّي يقدم من عمل غير يلقاه والحاء حقوق الناس لاتحتملها=افطن لها يالقرم واذهن تصلها وردّ الجميله بالجميله لاهلها=واللّي يقدم طيب بالطيب تجزاه وعلى حقوق الناس يامن تجرّا=ماينفَعَك بعدين لو اتبرّا خلك شريف وشهم مادمت برّا=واعرف طريقك لاتحيد وتعدّاه والخاء خويك واجبه لاتخليه=اذا صفالك ظاهره ثم خافيه وبالرّاي شيره واقمع اللّي يعاديه=ترى من حقوقه ليا جاك تحماه خوي جنبك بالدّرك لاتكبّه=والّا اذا قفّى تقوم وتسبّه انكان لا حبّك ولا انته تحبّه=اللي يبا فراقك ترى الخير فرقاه والدال درب الخير وانت بمحلّك=اذا بغيته واجد اللي يدلّك واذا تبعته بالسفر مايملّك=ومن وفّقه ربي يدلّه ويقداه يقداه ربي للهُدى والصوابي=واذا دعى صار الدّعى مستجابي ويجزاه ياهل المعرفه بالثوابي=رباً كريم ويسمع العبد ودعاه والذال ذات البين يابن الحمايل=حاول على اصلاحه بكل الوسايل ولاتجامل المخطي ليا صار مايل=الميل ظلم ولابه انسان يرضاه والحق عدّه لو تبين الخوافي=عد الحقيقه عدّهــا لا تخافي والقلب خلّه طول الايام صافي=والصدق خلّه ميزةٍ من مزاياه والراء رايك عدّله لاتخالف=ولاتنفّذه كانه بشيٍ مخالف وان تهت شاور واستشير العوارف=وراي العوارف لاتكبّه وتنساه ومن يقفي برايه بليّا دليله=يضيع مابين الدروب الطويله ويصير لاحيلاً ولامعه حيله=ولاعنده احدٍ ساعة الضيق ينخاه والزاء زماناً فيه كل العجايب=ومشاكلٍ مابين مخطي وصايب خلّى الشباب من العنى فيه شايب=وكثرت كوابيس الزمن لين عفناه هذا الزمان اللي يبيح السدودي=فيه المصايب كل ليله تزودي ليل ونهار مصدراتٍ ورودي=ولاحدن يقاوم والزمان يتحدّاه والسين سدّك للعرب لاتبيحه=هذي حقيقه والصراحه مريحه اقولها وانت اعتبرها نصيحه=وكلاً بكيفه ويتصرف بدنياه لاتنخدع وتضيع بين الخلايق=ترا الاوادم تختلف في دقايق لو فيهم الوافي ترى فيه بايق=واصبر وكلاً يكشفنّه نواياه والشين شيبانك عسى الله يصونك=من صغر سنّك كلهم يرتجونك ابوك وامك حطّهم في عيونك=وردّ الجميل وحقّهم لاتناساه ربّوك يوم انك بيدّين محمول=لين اكتمل جسمك من العرض للطٌول واليوم يبغون الجزاء منك مدبول=رد الجميل لمن عطاكيه واوفاه والصاد صلح كل غلطه بماضيك=واقنع بما يقسم لك الله ويعطيك واحذر على الانسان تبدي شكاويك=اشتك على اللي ماخسر من ترجّاه اللي خلق عبده ومقدار قوْته=وبيديه حكمه من حياته وموته واوحى ندى ذا النون في بطن حوته=يوم استغاثه هوّن امره ونجّاه والضاد ضد اللي يضدون الاسلام=وخلك عليهم سيف قاسي وصرّام والدين واهله خلّهم درع وحزام=واخلص عملك الي تسوّيه لله واللي يعز الدين ربي يعزّه=ودايم قوي الدّين محدن يهزه والرمح في نحر المعادي يغزّه=ولافيه رحمه للمعادي وماواه والطاء طيع الله في كل حاله=تكسب رضاه وكل خيراً تناله ومن لا يطيع الشور مالك وماله=خلّه على كيفه وذوقه ومشهاه خلّه على كيفه وعقله يقدّيه=اذا رضيبه واقتنع لا تناديه امـّا يدلّه صـَحْ والّٓا يدٓهويه=الرّاي رايه والمطايا مطاياه والعين عِيْن المسلم اليا تنصّاك=لاتردع المحتاج يوم الله اغناك طيب ضميره والجزاء عند مولاك=في ساعةٍ تحتاج عفوه وحسناه والناس ذا معطى وهذا مقلّٓي=والكل منهم له بدوره محلّٓي مير الحضيض الطايع المستدلّٓي=يعطي ماتدري شماله وش تمد يمناه والغين غيِّر كل منكر تشوفه=انكان ماتلحقك منه الكلوفه واعرف ترى دنياك ماهي حسوفه=وزوالها له موعدن مايتعدّٓاه دنياء تغرّ وتختلف كل ساعه=لكن ماهي راس مال وطماعه يشوم عنها كل راعي قناعه=يبغى ثواب الاخره ويتحرّاه والفاء فك المسلمين من اذاكا=لاتتبع ابليس وتزيد بخطاكا اذا تبعته بالمهالك رماكا=واخطيت دربك وانتحى مانت وايّٓاه واللي يقول ان الخطا شي عادي=تراه تايه في طريقه وغادي مثل العمى مايسري اللّٓا يقادي=واعمى البصر يصبح ويمسي بعمياه والقاف قل للّٓي قليل امحصوله=يحسب ليوم يشيّٓب الراس هوله وترى الاماني ماتجي بالسّٓهوله=مثل الجبل صعبٍ طلوعه ومرقاه وبكره على اعمالك يحاكمك قاضي=وينشر صحايفك الطوال العراضي والحكم يصدر ماعليْه اعتراضي=الحاكم العادل له الحكم وامضاه والكاف كلاً له طبيعه ودلّٓى=احدن مزاجه مر واحداً محلّٓى لكن بكيفه ان نزل وان تعلّٓى=امّٓا اسعده رايه والّٓا تعنّٓى وعنّٓاه وايامنا فينا تعشّٓى وتغدّٓا=وتدرج رحاها فوقنا واتحدّٓا وهدّٓت جميع اللّي بنيناه هدّٓا=حياً رحل واقفى وحياً بيقفاه واللّٓام لو نمشي على خير منهاج=عشنا بسعاده وانعدل كل منعاج ولاصار بالأمّٓه شقيً ومحتاج=ولاحدن شكى صكّٓة زمانه وبلواه وما اقول غير الستر ربي يديمه=اليا وقفنا والمواقف عظيمه يوم النهايه فوز والّٓا هزيمه=يالله عسى الرحمه علينا مضفّٓاه والميم من يمشي وطرفه يغظّٓه=ويصبر على وقته لو انّٓه يعظّٓه جات السعاده من نصيبه وحظّٓه=وتحقق اللّٓي يطلبه ويتمنّٓاه ومن صان نفسه عزّٓها واستراحي=وارتاح من جيّٓاتها والمٓرَاحي والخير فاله بالمسى والصباحي=واللي يبيه ويطلبه من فداياه والنون نقّٓيت البيوت الشهيره=ورسمت معناها بعقل وبصيره من فيض فكرً فيه خيرٍ وخيره=والشعر لا عيباً ولافيه مزراه مثايلٍ فيها المعاني سماني=ترجمت خافيها وجبت البياني وعبّٓرت فيها عن خفايا زماني=وعوايقه واللي غدو من ضحاياه والواو وقتٍ مختلف من صفاته=والمجتمع يظهر للامّٓه شماته ومدري متى ربي يجمّٓع شتاته=ويوحده ويعز دينه ويرعاه والعز باقي بالنفوس العزيزه=والصدق رمزاً للنجابه وميزه وحب الوطن عند المواطن غريزه=ونصره وعزّٓه كلها من رعاياه والياء يوم اني تهيضت غنّٓيت=وابديت ماجاز لضميري وحبّٓيت وحسب اختياري جبت علمي بتثبيت=وثبّٓت ماقلته بليّٓا مراواه وانا هويت احلى المثايل هوايه=ولي قصد في حبك المعاني وغايه وحكّٓمت رايي يوم كلاً برايه=وكلاً على جسمه ثيابه مقدّٓاه والهاء هذا اللّٓي سعيت لبيانه=وعندي تفاسيره وعندي ضمانه ولاجبت بيت يقال من دون خانه=البيت المّٓه وانثره قبل لا ابداه واذا دعاني للمواقيف داعي=لبيّٓت للدّٓاعي بكل المساعي والشعر لو يعصي ليا جيت طاعي=حكمه من الله والا انا ويش لولاه وهذا كلامٍ مايضم اللّٓغوزي=عساه للّٓي يستمعله يجوزي وعلى رضاكم ياجماعه يحوزي=وتحوز لرضاكم بيوتاً منقّٓاه واقول يالشعّٓار ماعاد باقي=الا تحياتي وزود اشتياقي ولاهو وداع . اقول بعده تلاقي=وهذي تحيّٓه كلها طيب مهداه واخر كلامي يالحضور الكرامي=صلو على الهادي رفيع المقامي شفيعنا يوم الحشر والزحامي=اللي دعانا للهُدَى واتٌّبعناه = = ردّ اللحالي الغيداني ألالف ولّفت الكلام وكتبه=عن فكري اللي بغلطاني نكبته في غلطةٍ بحسابي الّلي حسبته=والّلي كتبت وتاه فكري بمعناه قريت بالتّشديد كلمه ثمينه=وفهمت معناها مغاير كمينه وصار الصّواب الجزل ويني ووينه=وصوابي المعهود ماني بويّاه وأمهار فكري ينفضنّ الشّكايم=لو قيضهن يلفح بْحِرَّ السّمايم ولو من تعايبهن تشوط النّسايم=في وقتهن والعلم مابه مناجاه والعذر ماني شايفن به فوايد=حصل الغلط يا مدوّرين النّقايد وأنا أدري إنَّ العلم ما به حمايد=مع واحدٍ عندي له القدر والجاه والباء بعد ما صار يالشّايب أغلاط=هقيت ما تسوى ولا ربع قيراط لكن ليا شعمت نارك بشخّاط=اصبر على المكتوب لو به معاناه تراك بالدنيا يجيلك صواديف=على مثل ما قيل ما هي على الكيف مانت الوحيد اللي شكيت التّحاسيف=كم واحدٍ يا كثر همّه ومشكاه والتّاء تناجيت بزمانك لحالك=النّاس ما جتلك على اللي فبالك والله عليم بميلتك وانعدالك=ممشى الكزز للسّيل في غير مجراه ما قلت أنا بمشي على غير يِمّه=ولانيب من له هرجةٍ بالمذمّه الله يخارجنا من شرور الأمّه=كلن يبي يرحل ويلقا سواياه والثّاء ثمر مجهودي اللي بذلته=إنّي أمام النّاس في ما عملته وأخصّ من يفهم بمنطوق قلته=ومن لا فهمني ما تجادلت وياه أقول كلٍ مقصده جايزٍ له=في حاضره بعد الوقوت المزلّه كانه تذكّر وقته الّلي حصلّه=وحسّب لغلطاته وكفّر خطاياه والجيم جمّ البير جاله شواريب=والّلي ورد من بعدهم كنّه الذيب هدّت عليه من الضواري نواحيب=وشاف العدد ماهو على ما تهقواه كثر العدد يغلب وحيد الشّجاعه=ليا كثرت الذّرعان تكسر ذراعه ثم سقم عشر سنين جاله بساعه=بالسّاعه الّلي ما تفيد المداواه والحاء حلات الآدمي في حياته=يعمل لما يحتاج له في مماته من مبتدى حرصه بواجب صلاته=حتّى خفوّ عبادته في خفاياه صحيح ما احدٍ سالم من الخطايا=لكن بفعل الخير يعمل سوايا والعالم الله في خفيّ النّوايا=ما خيّب الله من بسعيه ترجّاه والخاء خذينا بالزّمان اجتواله=غير الّلذي يصعب علينا وصاله منزالنا ماهو بحول ارتحاله=ومصباحنا ما ينتقارن بممساه ماهو بمجهود المكافح ينوله=من أجل ذلك ما تيسّر وصوله كم واحدٍ كافح وواجه خذوله=من ماصفق عزمه على حدّ شلفاه والدّال دون مصارع النفس للودّ=وش يفرق المزحات من هرجة الجدّ لو نعرفك يالبحر بالجزر والمد=ولو القمر يضوي على البحر بضواه وشاروا علينا مكثرين النّشايد=قلنا وش الصرفه بكثر العدايد ما كل من يقنص بمقناص صايد=كلٍّ على مجهود عينه بمرماه والذّال لو في حلو وقتك تلذّذ =يجيلك اللي بالشّلافي يحذّذ مدري يفكك منه كثر التعوّذ=وإّلا يزيد وتبتحل في مصالاه ثم عاد لو تكثر عليه العوايذ=كنّك بساحاته تدوّر شحايذ ما ينفعك لو في كثير اللوايذ=تبحث عن الملجأ ولا منه منجاه والرّاء رمانا وقتنا بالتمسعار=ما يكفي الضِّيفه لنا بألف دينار في مثل من يحدّه الغار للنّار= والبعض ما يقدر لقيمة ولد شاه والّلي ماهو قادر يواكب للاسعار=يبحل بما للضّيف مع واجب الجار وآخر حياته عايده للتّدهوار=أو يستدين وياصل السّجن ما أوفاه والزّاء زمانٍ فيه كثر التفزفاز= وعلى كثير الفزفزه مابه انجاز وقمنا نمضّي وقتنا بالتّلزلاز=حتّى الغني ماله بتصريفة أعداه ومصرّفٍ نفسه على غير جايز=لو جملة الصرفات ما هن عزايز ما هو على كيفه خيار الغزايز=هذا زمانٍ ما تعدد رزاياه والسّين سيف الوقت يبغي مسايس=ماتنفع الّلجه وطول الحسايس يبيك يالفلّاح بالزّرع رايس= يا معدلٍ روس الكلالي بمسحاه وإلاّ أنت يالّلي عارفٍ بالتضاريس=متخرّجن من جامعات الهناديس ما صرت مثل الصّاقطين المفاليس=الّلي جداهم قولةٍ واحّلولاه والشّين شل حمل الزّمان الغشوشِ=ليا صار حظّك للغشايش يحوشِ واصبر على جور الزّمان البطوشِ=كلٍّ بما يكتب له يشيل بلواه وإن مرّ بك دربك على دوحة الهيش=عطشان ما ذقت القراح النقاريش اعرف تراك معرّضٍ للنّواهيش=والحال لابدّه على غير مقداه والصّاد يا صاخر خروجك من النّصّ=عساك تعرف قصّة الّلصق والقصّ ولايجي جهدك بعرفك منقّّصّ=وتشوف تيهات الفكر من شقاياه حذراك من ما يلزمك لا ترخّصّ=منت مخلوقٍ بالكشاخه تشخّصّ دنياك لازم في خفاها تبخّصّ=لا دام ما جاك العميل بمناياه والضّاد ضيف الكون مع مبلجه فاض=وأبدأ بسبحاته على الأرض مركاض يقول من سمّاه بالاسم عوّاض=لكن بعد فتره باسم غير ناداه من ما قرض حال المنادي بمقراض=ومن ماتوضّأ فيه نِسْيَ التّمضماض وشلون يعرف عنه في حسن الألفاظ=ليا جاب خط الاردو وقام يقراه والطّاء طليب الرّوح ما عنده افراط=يا جاذب الجمرات في راس ملقاط عليك من قدح التّشارير تحتاط=بيضا زمانك نفعها مثل سمراه لو صار ترفيهك على ساحل الشّطّ=وعندك خدم وأنت الزّعيم وتشرّطّ لابد من وقتٍ به العزّ ينحطّ=ثم كيفك مع الوقت يا طير شلواه والظاء ضماك ومنه لازم تحفّظ=ياللي بموعوظ الوعايظ توعّظ دام إنّ وقتك به مجال يتعوّض=قبل العمر يمضي وتقفي مطاياه قدّامك الّلي منه قلبك يجوّظ=كل اعملٍ بمحاسباتك مفوّض وأنت المطيع ولا بوسعك تنوّض=داينك فعلك قبل تاصل لقظواه والعين علم وهدّ فيه المطمّع=الّلي يحاضر فيه والّلي تسمّع والّلي على درب الشتات يتخمّع=في قيضه الّلي منه يشكي ضماياه شتايته بالكون عيّت تجمّع=وابداده الخشنات ما تنتلّمع ونواظره من ما تعاني تدمّع=على وجونه يرسم الدمع مجراه والغين غفوة نومته في تدغداغ=وخذا على الجنبين كثر التمرّاغ وش عاد لو يملك قناطير الأصواغ=والعافيه بأوّل شبابٍ تبنّاه وفرنجي الملبس مع عقال وشماغ=ويصير له مع ما تمنّاه مبلاغ ومع غير نصف الروح ما له تمفراغ=متسيّدٍ وقته بحلو المناجاه والفاء فهيم الفكر يخشى الملاقيف= ليا جات غلطات الأوادم مراديف لو هو بحر ما شاف منهم تخاويف=عمر البحر ما يكهله كثر غرقاه مير البنادم يعترض له صواديف=منها لواهيده وكثر التّحاسيف وهذا بنادم مثل نبت الشّفاشيف=متعرّضٍ لفح الهبايب بعلياه والقاف قام القاف بالشعر ينساق=وقامت تجارى مع سواقيه الأذواق وين أنت يالّلي للتّناويع عشّاق=يصير لك في سوق الأذواق مقضاه في ما يشوق الفكر طبّ وتسوّق=كان أنت ودّك بالجزايل تفوّق وعلى مثل ما قيل بالكيف روّق=قبل العمر يبلى وتقفي مطاياه والكاف كفكفنا الرّشى ما بناشك=قبل انقراب اللي تقارب من الصّك لعلنا من شرهة النّاس نفتكّ=ما ودّنا في قولةٍ تاه ماطاه أيامنا بالعمر صارن وشايك=الله يكفينا شرور الشّوايك ومن كايد الشّدات لنا فكايك=لين الرّشى تكمل لفايف طواياه والّلام لولا الفكر ما يقبل الزّلّ=ما هو بزلّ فراش زلّ المعلّل كان استقرّينا على ما خذّا وخلّ=وقلنا لعيناكم كتبنا المجاراه لكن نحاول مع عماق السّلايل=إنّا نوفّيهم سمان الجزايل حسب اقتدار جهودنا بالبذايل=والكامل الّلي كلّنا نطلب رضاه والميم ما يخفى على من تذمّم=المقصد إنّه بالصّعيد يتيمّم جزالةٍ فيها الضّمير يتهمّم=وإلاّ وقع في ما يدينه بتهماه خسارةٍ من بعد كسب الغنايم=تجي لواهدها بصلب الصّمايم ولا يفيدنّ الحسف والنّدايم=لو مجلسك متعاكساتك مراياه والنّون في نظرات من يستضيحون=الّلي من رفاع الشّواهق يطلّون كلٍّ يقرّر حسب ما هم يشوفون=والّلي عمى يكفيه عذره بعمياه والّلي يمسّح دمع عينه بفاين=وهو ما بقيله في زمانه سناين فيه الّليالي يدركنّ الغباين=ليا صار ما له من يقوم بثواياه والهاء هوى بالي بما يهتديله=لا دام لي في فرصة الوقت حيله ماني على قولة هذاك الهبيله=عطاني الله عقل وأعرف سجاياه والوهبه الّلي بالقوافي جزيله=فيها تعابيري لشرحي وسيله يمكن يفيد الغير وأكسب جميله=أخير من هرجٍ عديمه جداياه والواو وين الّلي مطاميعه الجوّ=في حضرة الّلي بالاوفوق استعزّوا كان إنّهم من ما تمادو تقزّوا=وكلٍّ على ما قيل غنّا بليلاه ثم استشاطوا بالملام وتنادوا=وتحادموا بمشاورات وتهادوا واسترجلوا خطواتهم ما ترادوا=إمّا حياة العزّ وإلاّ الموافاه والياء يجيلي صدفةٍ بندلاجي=في ساعةٍ فيها يروّق مزاجي ويصير قاف الشّعر بلسم علاجي=آخذ معه في سجّة الفكر مغزاه وكلٍّ برأيه مثل ماني برأيي=ما ينتعايالي مثل من يعايي ولا سايئ السّيّه على من يسايي=أنا بختماتي وكلٍّ بختماه = = |
|
|
|
09-21-2014, 02:08 AM
|
#2 |
|
إدارة عامّة
تاريخ التسجيل: Sep 2014
المشاركات: 1,852
|
|
|
|
|
|
09-21-2014, 02:33 AM
|
#3 | |
|
مالك الموقع
تاريخ التسجيل: May 2014
المشاركات: 6,555
|
اقتباس:
كفو عليك المفهوم الجزل يالجزل
__________________
لا إله إلا أنت سبحانك إنّي كنت من الظّالمين |
|
|
|
|
|
09-21-2014, 02:40 AM
|
#4 |
|
إدارة عامّة
تاريخ التسجيل: Sep 2014
المشاركات: 1,852
|
لكن لازم تحط في كلامك الغاز في كثير من ردودك لكن الله يستر عليك |
|
|
|
 |
| الذين يشاهدون محتوى الموضوع الآن : 1 ( الأعضاء : 0 , والزوار : 1 ) | |
|
|
العرض العادي
