يالله يا مجري تصاريف الأفلاك

[اللحالي]

يالله يا مجري تصاريف الأفلاك=‎يارب يامحيي الديار المحيله

أنت الكريم وكل خلقك ترجاك=‎نطلبك جودك يامنجي دخيله

يافارج الشدات بالضيق ننصاك=‎عليك تخفيف الحمول الثقيله

ماخاب مخلوق لجا لك وناداك=‎من لا رحمته ياالولي عزتيله

ياالعبد لاتشكي علي غير مولاك=‎مايجدي المخلوق لو تشتكي له

لو تشتكي للعبد ماثاب شكواك=‎ماله على حل المصاعب وسيله

لاصار ماتقضي لزومك بيمناك=‎مقسوم رزقك ماتحوشه ابحيله

لاتحتمل معروف هذا ولا ذاك=‎لو قل مالك والموارد قليله

لاشك نفسك عزها عن دناياك=‎والرزق خلاق الخلايق كفيله

ولا تلتهي بالمال والموت يقفاك=‎العمر يفنا بين يومن وليله

تسير بك سمر الليالي لمثواك=‎ومن طول المنزل لزومن رحيله

لابد من يومن عذاراك تنعاك=‎ولابد ما ينقال هيا نشيله

مافيه بالدنيا مواطن وملاك=‎كلن يسير وعابرن في سبيله

وكانك تحسب انك مخلد بدنياك=‎فكر وناظر وين جدك وجيله

واسمع كلام اللي على الخير وصاك=‎قوله يحثك للشرف والفضيله

يرشدك لدروب المكارم وينهاك=‎‏‎‎عن موقعن فيه الدنس والرذيله‎

وعن صحبة الهلباج واللاش حذراك=‎من صاحب الخايب يحطه زميله

قرين سو ابليس مغويه وأغواك=‎عميل شر ولا يربح عميله

عزاه لك من خوته كان خاواك=‎يرميك بدروب الردا والفشيله

عليك باللي للشرابيك فكاك=‎قرمن اليا حدك لزومك تجي له

لا جيب علم الطيب ينقال شرواك=‎يرقا درج ممشا الخصال النبيله

والا الردي لوهو ولد عم يجفاك=‎ورايه بعد مايستشير الحليله

وش عاد لو تقضي لزومه ليا جاك=تجهد عليه وفوق راسك تشيله

اليا قضى بك حاجته راح يشناك=‎وغيرك عمل به طيب وانكر جميله

اليا بداله لازمن جاك ينخاك=‎وان درت به لازم ضلوعه هزيله

مدحك يغيضه كان به جيب طرياك=‎وعليك يفرح بالخزا والخذيله

ضميره اسود والحسد سم فتاك=‎اليا سمع مدحك تزاود غليله

قصده يغار ولايسوي سواياك=كبه وتلقا لك رفيق بديله

تراه مهما جدت له خاب مسعاك=‎ومن تاه فكره مايفيد الدليله

عليك باللي دوم يحرص على رضاك=‎قريب لك لو هو بعيد القبيله

احرص عليه وسامك العرش ياقاك=يروف بك عن كل عيله وميله

واليا مشيت اجعل على الحق ممشاك=‎مايرتفع راع الدجل والختيله

وصلواعلى اللي بالهدى زال الأشراك=‎‏شفيعنا عن حر جمر المليله

الشّاعر تركي بن فوزان بن ماضي التميمي

اصايل معجب بهذا

[اصايل]

اللهم صل وسلم ع نبينا محمد
صح لسان الشاعر
وسلمت يمناك ع النقل الرائع
كل التقدير والاحترام

اللحالي الغيداني معجب بهذا

[اللحالي]

آمين الله يجزاك الخير مديرتنا

اصايل حرب ؛ تحيّه وتقدير