من قصص جدتي

[ترانيم حربيه]

بسم الله الرحمن الرحيم

اليوم بجيب لكم قصه من قصص جدتي اللي دايم تقصهم علينا اذا جلسنا عندها وتركنا هالشيطان على قولتها

الي هو التليفزيون

تقول كان فيه رجال على باب الله متزوج من بنت عمه وكانت زوجته كل ماحملت جابت بنيه لحد ماصار عنده ست بنات

ويوم حملت حملها السابع قال لها ان جبتي بنت والله ما عاد تشوفين وجهي اني لاترك البلد واسافر هي طبعا ما في يدها

حيله كله من رب العالمين المهم عاشت كل شهور حملها على اعصابها خايفه لا تجيب بنت ويتركها هي وبنياتها بلا معين

طبعا الله له حكمه في كل شي ولدت وجابت بنت ويوم جاء من صلاة الفجر قالت جارته اللي مولده زوجته ابشر لك بمهره

ماتكلم مر على بناته وهن نايمات وقبل كل وحده على راسها واخذ عصاه وطلع من البيت

الزوجه يوم ما شافته عرفت انه نفذ تهديده وتركهم قالت في نفسها ما يتركنا اللي خلقنا وحمدة ربها على العافيه

جلست اسبوع وجارتهم تجيب لهم غداهم وعشاهم وتقول انتي تعبانه وما تقدرين تسوين

بعد الاسبوع شكرت جارتها وقالت خلاص انا هالحين بخير وقدر اقوم بشغل بيتي المهم اصبح عليها الصبح وهي

تفكر وش تسوي ع شان تقدر تعيش هي وبنتها من غير حاجة احد وقررت انها تطلع للبر وتجمع بعض الحطب وتبيعه

وبثمنه تجيب شي ياكلونه توكلت على الله ووصت بنتها الكبيره على خواتها واخذت حبلها وفاسهاوطلعت للبر تحطب

راحت معها وحده من بناتها الصغار بدت تجمع الحطب وتصفه على الحبل ويوم ملت الحبل وربطته قالت لبنتها يله

مشينا قالت البنت لا ماني رايحه الين تطلعين لي الحديده هذي راحت لم بنتها تشوف وش عندها لقتها ماسكه حديده

زي الحلقه وتسحبها وهي مندفنه في الارض حاولت تسحبها مع بنتها ماقدرت جابت الفاس وصارت تحفر حولها

ويوم شالت التراب اللي حولها ويطلع لها قدر مدفون فتحته ولاه مليان جنيهات ذهب قامت تطالع فيه وماهي مصدقه

اللي تشوفه بعد ماتاكدت انه كنز سجدت لربها من الفرحه وفكرت كيف تشيله كانت لابسه ثوبين فوق بعض

فقررت انها تفصخ واحد منهن وربطت كمومه مع جيبه وصار زي الكيس شالت كل الجنيهات اللي في القدر وعبتهن

في الثوب وحطته في وسط ربطة الحطب وشالته على راسها وراحت لبيتها بسرعه وصلت لم بيتها وفكت حزمة الحطب

وطلعت الذهب وحطته في صندوق عندها واخذت منه كم جنيه وشالت الحطب وراحت لم سوق في وسط الديره

وجلست كانها تبي تبيع الحطب وصارت تطالع الناس اللي في السوق شافت ذاك التاجر اللي كل الناس تتعامل معه

اللي يشتري منه واللي يتسلف منه واللي يحط عنده امانه عرفت انه رجال راعي خير

بوقف القصه هنا اذا عاجبتكم وتبوني اكملها كملتها واذا ماهي عاجبتكم لاتستحون

قولوا ضفي وجهك انتي وسبحونت جدك الخايسه وترى ماراح ازعل بس ابي ابكي وسلامتكم

ههههههههههههههههههههه

ابو مناحي ,رجآوي ,اللحالي الغيداني معجبون بهذا

[اللحالي]

واصلي الله يجزاك الخير انتي وجدتك الله يعافيك ع المجهود

كملي القصّه لاجيك ياااااااام وينك من قبل نوح ياجدّ آدم

ههههههههههههههههههههههههههههههههههههههه

[أيوب البلاجي]

ا

اهلاترانيم
كملي : القصص هذي ممتعه قصص الأولين معك 24 ساعه ولاتراي ادور جدتك وأنشدها عن القصه ..............

رجآوي ,اللحالي الغيداني معجبون بهذا

[رجآوي]

ترانييييييييييييييييييم

جدّتك الله يخلّيها لك لازم تشرّف عندنا وتحطّ لنا قصص من هالقصص الحلوة

والله أنا دخلت جوّ مع القصّة بس وقفتك هذي قهرتني ههههههه

اعجلي علينا كمّلي السّالوفه الله لا يهينس

.

اصايل ,اللحالي الغيداني معجبون بهذا

[ترانيم حربيه]

هلا وغلا بالجميع جدي ابوسلطان اخوي ايوب اختي الغاليه رجاوي

تامرون امر بكملها خلاص لاتزعلون ههههههههههههههههه

اللحالي الغيداني معجب بهذا

[ترانيم حربيه]

وقفنا السبحونه عند المراه وهي جالسه في السوق وتطالع في الناس لين شافت التاجر اللي كل الناس يتعاملون معه

راحت لمه وسلمت عليه وقالت ياوجه الخير انا مره غريبه وجايه ابي اسكن انا وبناتي في ديرتكم وبي العونه من الله ثم منك

قال ابشري بللي تبين قالت انا الحمد لله الخير عندي واجد وابيك تشتري لي بيت كامل من كل شي ومايهمك السعر

قال وصلتي الى خير انا عندي بيت جاهز وفيه كل شي شرت البيت ونتقلت له هي وبناتها وتركت حارتهم القديمه

اما زوجها فهو من بعد ماطلع من عندهم وهو من ديره في ديره يدور ارزاق الله يجلس في ديره شهر وفي ديره اسبوع

وديره ما يلقى فيها شي ويتركها الين وصل ذيك الديره وكان تعبان وجوعان وحالته حاله دخل المسجد وصلى العشاء

ونام فيه ويوم اصبح طلع للسوق يدور على شغل لكن مالقى شي رجع للمسجد وصلى الظهر وجلس الين العصر وهو

رابط بطنه من الجوع وكان الناس في ذاك الوقت يتعشون بعد العصر كان في المسجد شايب كبير في السن ويظهر

عليه الوقار والطيبه ناداه وقال وش فيك يا ولدي انت غريب عن الديره وشوفك من البارح وانت في المسجد عسى

ماشر وكان الزوج ضايقه عليه الدنيا وماصدق ان احد يساله قص عليه قصته كلها من يوم ماطلع من بيته وترك زوجته

وبناته للحين تبسم الشايب وقال عين خير ياولدي انت تغد معي اليوم ويبي يحلها الله قال بس ياعم انا اشوفك ماتطلع

من المسجد وش اتغدى معك قال الشايب وانت صادق يولدي انا عايش في الغرفه اللي في حوش المسجد لاني رجل

كبير ومااقدر اجي للمسجد كل وقت اذا كنت بعيد عنه تعال نروح للغرفه ونكمل سواليفنا هناك مسك يده وراحوا

للغرفه قال الشايب انا عندي ثلاث بنات وولد وكلهم متزوجين وعنهم خير والحمد لله ومايخلوني يجيبون غداي وعشاي

وينظفون ملابسي وانا مرتاح في هذا وفي هالوقت سمعوا باب الغرفه يدق قال الشايب ادخلي دخلت اللي عند الباب

وراحت لم الشايب وحبة راسه وحبة يده وقالت هاه يبيي عسى ما جاك احد قبلي ونزلت قدامه ميقعه وسطل لبن

وقالت عند شي يبي تنظيف قال شوفي الثوب والشماغ عندك خذتهم وطلعة قال الشايب تعال نتغداء فتح الميقعه

ولا فيها ذاك الجريش اللي ريحته تاصل الدماغ ومدهون بسمنه وعليه قطيعات لحمه ماهنا زينها سموابالله وكلوه

يوم خلصو اومسحوا يديهم والا الباب يدق قال الشايب ادخلي دخلت اللي عند الباب وراحت للشايب وحبة راسه ويده

وقالت هاه يبه عسى ما جاك احد قبلي قال ابد نزلت قدامه ميقعه وسطل لبن قالت عندك شي يبي تنظيف قال لا

طلعت بعد ما وادعته فتح الميقعه وقال تعال نكمل غدانا جاء وجلس وطالع الميقعه والا فيها ذاك المرقوق اللي

يفتح النفس عليه قفر وفقع وسموا بالله وكلوه يوم مسحوا يديهم والا الباب يدق قال ادخلي

دخلت اللي عند الباب وسوت مثل ماسوو خواتها ونزلت الميقعه عند ابوها وسالته اذا محتاج شي قال سلامتك

وادعته وطلعت فتح الشايب الميقعه وناده قال تفضل والافيها ذيك القرصان المبلوله بذيك المرقه والخضار المشكله

سموا بالله وكلوها وشربوا من اللبن وتسدحوا قال الزوج في نفسه اذا كان هذا شغل البنات وش بيصير شغل الولد

وقبل ما تغاب الشمس بشوي سمعوا الباب يدق قال الشايب ادخل انفتح الباب ودخل هاكالولد شايل معه باديه ما غطيت

قال جدي دوك غداك ونزلها على الارض بقوة وطلع ناظر الزوج في الباديه والا فيها قطعة سميت يابسه (والسميت

تقول جدتي انه زي الجريش بس يصلح من الذره ويكون جاف)ومعهاكسرت عظم بعير عليه شوي عصب رفع نظره

للشايب والاه يبتسم قال هذا الفرق ياولدي بين البنت والولد راجع لبنياتك وربهن تربيه صالحه وماراح تندم نام عنده

ذيك الليله ومن الصبح وادعه ورجع لم ديرته ويوم وصل وراح للبيت والا مافيه احد خاف يكون جاهم شي بعده

ضاق صدره وطلع برى الديره عند المكان اللي يجيبون منه الماء والا يشوف بنياته مع امهن يروون قرب منهن

ويوم شافنه البنات ما صدقن وقامن يصارخن ابوي ابوي جا لمهن وظمهن لصده وجلس يبكي جته زوجته وقالت

وش فيك تبكي مهوب انت اللي تركتهن قال سامحيني يابنت عمي انا اخطيت وطالبك السموحه وخلاص ابي ارجع

اشتغل ونرجع لبيتنا ونعيش مع بعض انا مالي الا انتم قالت بصير احسن منك وبسامحك ع شان هالبنات يعيشون

بين امهم وابوهم واخذوا ابوهم وراحوا لم بيتهم وعلمته زوجته بكل شي حصل لهم بعده وعطته من الجنيهات

وفتح له محل وصار يبيع ويشتري وعاشوا حياتهم مع بعض

وسلامه تسلمكم

اصايل ,اللحالي الغيداني معجبون بهذا

[رجآوي]

الله الله قصة رووووووووووووووعة

أهم شيء إنّها واقفة بصفّنا هالسّالفة هههههههه

والله بصراحة عيّشتينا جوّ حلو وأمتعتينا يا ترنومه

أنتي وجدّتك لا تهون الله يخلّيكم لبعض يابعدي


عآد ما أوصّيك لا تحرمينا الجديد متى ما فضيتي لنا ههههههههه

وحبّي لي رأس جدّتك وقولي الله يجزاها خير ويمتّعها بصحّتها

.

اللحالي الغيداني معجب بهذا

[اللحالي]

الله يسلمك من كل مكره وجزاك الله الخير على هالقصه

انتي وجدتك يالغاليه ؛؛؛ تخبرين اللي بيننا من هواش

مستمر من سنين لكن عشان هالقصّه بنتصاحب لمدّة

19 يوم ثانيه من ميل ليا ميل يجيب الله فرج من عنده

[أيوب البلاجي]

يعطيك العافيه ترانيم على نقل القصه الرائعه

ماقصرتي هالحين اباروح انام بس والله إني خفت على الشايب من السمنه ....شكريات...............

اللحالي الغيداني معجب بهذا

[ترانيم حربيه]

تسلمين رجاوي الله يخلي لك غواليك ويسعدك

ابشري عاد ااخاف اعلم جدتي تستانس وتخليني اكتب

كل يوم قصه هههههههههههههه

اللحالي الغيداني معجب بهذا