المشاهير

[اللحالي]

يالـلـي لقـيـتـوا بالـقـوافـي مـراتـيـع=إن صـار لـي مرتـع بهـن صوّتـوا لـي
تـراي مانـي عـارفٍ ويــن أبــا اضـيـع=ومجهود فكري ضاع منه محصولـي
والـنَـاس تـشـره بالبـيـوت النِّـوافـيـع=وأنــا بـجــزلات الـقـوافـي جـهـولـي
وإن قلت ما لـي بالقوافـي مطاميـع=قـالـوا لــي إنِّــك بالقصـايـد بخـولـي
ثم شالني فكري على غيـر تسنيـع=وقمت أسرد الأبيـات سـرد مهبولـي
وإن صفِّـقـوا بكفـوفـهـم والأصـابـيـع=ثم شفت حالي بين مِن صفِّقوا لـي
إنِّــي مـثـل زعـيـم قـــومٍ طـوامـيـع=على ضعون النَّـاس تركـض خيولـي
بالـهـدَّه الـلـي قــام فيـهـا الـفـراريـع=كــلٍّ بمـجـهـوده يـصــول ويـجـولـي
تـخـيِّــلاتٍ مــــا تــضــوِّي مـنـافـيـع=لـو تمتـر النَّظـرات عرضـي وطـولـي
هـــرجٍ يعـافـنِّـه طـبــول الأسـامـيـع=عنـد أهـل التَّفكـيـر مــا لــه قبـولـي
وأنـــا وفــكــري فـرِّقـتـنـا الـرِّوابـيــع=مـا اشوفنـي حولـه ولا هـو بحولـي
يـا مـا نهيـتـه عــن بعـيـد المشالـيـع=لـكـن عنـيـد ومــع عـنـاده زعـولــي
ومـع الزَّعـل كـم وزَّع العـقـل تـوزيـع=وأنـا وفـكـري بينـكـم وافـزعـوا لــي
أنا اشهد إنِّي منـه شفـت المواجيـع=علـى مـثـل مــا قـيـل بـيَّـد حيـولـي
هو وش يبي في سالفة ذيب وفديع=وابـن جـزا بعصـور قضـف الظِّلـولـي
مـا هـو ابـن ناحـل معشِّـي مجاويـع=ولا هوب معجب في سديد الحلولي
ولا هــو أبــو حــوَّاس بـاتــع بـواتـيـع=لـيـا ثــار عــجّ منـسِّـفـات الـذِّيـولـي
ولا هو ابـن فويـران حامـي مفاجيـع=زيــزوم قــوم وبالمـواقـف صمـولـي
ولا هو أخـو سـاره يـدوس المجاميـع=مـا هيِّبـه سِقْـمَ الطّـعـون القتـولـي
ولا هـو ابـن صــلَّال قـاطـع قواطـيـع=لـيـا قــال خلّـونـا نهنـاهـم فـعـولـي
ولا هــو أبـــو جـــزَّاع بـــارع بـواريــع=عـزيـز نـفــس وبالـمـكـارم جـزولــي
ولا هو مثل من مثلهم من مشاجيـع=الـلـي مسمّـاهـم كــرام السّبـولـي
أنــا وش أســوِّي بصـلـف التِّطـابـيـع=تكفـون يَهْـلَ المعرفـه حكِّـمـوا لــي
ليـا صـار مـا يعـرف يـمـوح المقالـيـع=ولا علَّـق الصَّفـنـه شــداد الذِّلـولـي
ولا هـــو شـمـالـيٍّ يـــدرِّج مـرايـيـع=يسخِّن حليب مِـنْ أمَّهـات الطّفولـي
ولا هـــوب زرَّاع ويـسـنِـي مـراجـيـع=ولا هـوب وبّــال يـســوق الـرِّحـولـي
ولا لــه مــع انتـرنـتّْ هـبَّـة ذعـاذيـع=ولـو حِـطّْ بالقِـمـره يصيـبـه ذهـولـي
وشـرهٍ علـى يـمَّ الفضـا لـه مطاليـع=وهو ما ثبـت لـه بيـن ناسـه مثولـي
مـع واسـع الّلجـات راعـي مشـاريـع=فـي مجلسـه بمشـورزات الزِّلـولـي
الله عطـانـي فـكـر مــا لــه موانـيـع=لـكـن مــع أيّـامـي تـخـالـط لـيـولـي
أحسـب سنـه بشهورهـا والأسابيـع=لكـن طلوعـي بالـعـدد مِــن نـزولـي
لا واهنـيّ مِـنْ قـال للشِّـعـر تـوديـع=ولا عـاد يـعـرف وش بقـافـه يقـولـي
ماصـيـر بالسِّهـلـه مـطــرِّد جـرابـيـع=والكلّ منهـن مـا يبـي شـوف زولـي
وتـعـال تـفـرَّج عـلـى راعــي الـرِّيــع=ياللي تبـي سـرد السِّوالـف يطولـي