ديوان سعد تركي السمين الحربي

[سعد السمين]

الجروح

تـدري وش اللـي يذبـح الحـر بالـهـم=ويهـد حيلـه عـقـب مــا كــان طـايـر
مطيح ريشه دايـم أقـوى مـن السـم=عقب الفضاء عود على الرجل ساير
ومثلـك يابـو يوسـف مجـرب ويعـلـم=إن الـزمـن قـاســي علـيـنـا وجـايــر
وإن البـشـر أنــواع كـافــر ومـسـلـم=وفي بعض هالعالـم أنـا صـرت حايـر
لـعـل منـهـو يظـلـم الـنـاس يظـلـم=والجرح في قلبـه علـى طـول غايـر
ويـرتـاح منـهـو داخـلـه بــس يـكـتـم=الشـكـل هــادي لـكــن الـــدم فـايــر
مـاهـو بــرود بداخـلـه ولاهــو بحـلـم=ولا هو حسب بعد الفعل ويش صايـر
لكـن لأنـه فـي رضــى الــرب مـلـزم=ومن شان عين اللي لهم ألف خاطر
كـذا الجـروح أنـواع لـو تـنـزف الــدم=شيٍ يطيب وشـي مثـل المقابـر
ليت الجروح اللي لها صدورنـا تضـم=لـيـا جلـسـت فـتــره تـمــل وتـغــادر
جــرح يــزم وجـــرح مـاهــو بـيـنـزم=الله يعيـن اللـي علـى الجـرح صـابـر

سعد السمين

اللحالي الغيداني ,اصايل معجبون بهذا

[سعد السمين]

ماباس ياللي مًنَ هوى الزين مذبوح

ماباس ياللي مًنَ هوى الزين مذبـوح=من قال لك جرح الهـوى لـه مـداوي
جرح الهوى يبقى على طول مفتوح=ومـا فـيـه حــل إلا لجـرحـك تـخـاوي
كل الجروح اللـي تجـئ يمكـن تـروح=لآصـار لـك قلـب مًـنَ الـحـب خــاوي
ونصيحتي لأهل الهـوى تتـرك البـوح=البـوح لأهـل العشـق سـاس البـلاوي
لبيـه ياللـي صوتـهـا تـقـول مبـحـوح=وأنفاسهـا كنـه مًــنَ العـطـر جــاوي
لبيـه لـو حـتـى يسـبـب لــي جــروح=مسمـوح لـو إنـه علـى الجـرح نـاوي
سعد السمين

اصايل معجب بهذا

[سعد السمين]

لاعــاد تسئلـنـي

لاعــاد تـسـئلني أنــا لـيه ونـيت=وعـن سـبة غـنايه وكـثرة مزوحي

مـاهو عـلى كـيفي تـرا يوم غنيت=وجريت صوتي وأنت للصوت توحي

الـروح من غـنت وأنـا مثلك أصغيت=ويـشيل معها الصوت باقي جروحي

من شي في قلبي عن الناس خفيت=ويـاكثر مـا تخفي عن الناس روحي

من خـلقتي لـغير الـولي ماتشكيت=والـنـفس مـا تـقبل لغيره تـبوحي

يـدري عن اللي بـداخلي لو ما أبديت=ويدري عن اللي منه صدري يفوحي

سـبـحانه الـمعبود هو خالق الـبيت=إليا دعيته كل هـمي يـروحي

ســعـــد الـسـمـيـن

اللحالي الغيداني ,اصايل معجبون بهذا

[سعد السمين]

عندي خبر

يعني كذا يطري على بالك أنساك=ويـمـر يــوم ولا تـمـر بخــيـالي
ولا ليـا غبتي تبي تغيب طـرياك=طيـفك معـي يسـهـر بكـل الليـالي
باقي على حبـك وعايـش بذكـراك=ومشتـاق لك بالـحيـل ياكـل غـالي
وعندي خبر عن قصـة الحزن وبكاك=وعن دمعك اللي زايـدٍ بإنهمالي
ياليـت لي قـدره وأجي وأترضاك=وأمسـح بعـض دمع على الخـد سـالي
وأقولك هات الحزن والفرح هـاك=افـرح وخـل الحـزن لـيـه لـحـالي
ما للفرح طـاري بحياتي بليـاك=ولا أبيه مـن دونـك ولو هـو جـالي
حاولت ثم حاولت لأجل أكسب رضاك=وصبـرت مـن شـانك على كـل صــالي
وأتعبت رجلي يــم هـذا وهـذاك=ومـافيهـم اللي بفـزعته رد حـالي
كله علشـانك عسى القلب يفـداك=وعـشـان لـي قلـبٍ بـحـبـك يبـالي
الله يسـامح من على العـز ربــاك=جيتـه على وعــده ولا ســر حــالي
لكن عسـى ربي على طــول يرعاك=وتنسـى حــزن قلبـك وتلقى بـدالي
ياقلب ليه الوقت والحظ عـاداك=والـلي تحبـه يصـيـر حبـه خيـالي
وليه الموده تنقلب بعد وإرباك=وينهــد برجٍ للمحبيـن عــالي
وليه القلوب اللي تبيهاوتبغاك=بليـا سبـب مـالك عليهـا مجــالي
لكـن كذا الدنيا طبيعي تحـداك=وتضحك بوجـه اللي من الحـس خـالي

سعد السمين

اللحالي الغيداني ,اصايل معجبون بهذا

[سعد السمين]

الـريم

ريـم رمى سهمه عليه ولا أخطاه=شق الضلوع وصاب قلبي وتله
فـي ديرةٍ ماجاء على بالي ألقـاه=لـو قـيل لـي ماكنت أصدق محـله
سبحان من حـط الحـلا في محيـاه=مـهـما تـطـالع بـالـوجه مـاتمـله
ولـيا تكلم بس عينـك على شفـاه=وصـوته عـلاج وبـلسم لـكـل عـله
لــو الـبـحر خـالـط ثـناياه حـلاه=سـكـر نـبات ومـاتبي مـنه حـله
وليا ضحك كـل الـحلا في ثناياه=في ضحكته يضحك له الكون كله
ولـيـا زعــل ودك بـجنبه تـرضاه=وتـقـوله خـل الـزعل عـنك خـله
صـادق بـتعبيره وصـادق بمعنـاه=إحساس صادق صعب غيره يصله
أخـذت أنـا ويـاه لي وقت منساه=درب الـهوى قـلبي وقـلبه يـدله
صـور لي اللي صابه بفعل دنياه=وعـاف الـحياه الـلي تهين وتذله
يـقول لـيه؟ الـلي نـبي ونتمناه=صـعـبه عـلـينا لــو بـغينا نـصله
وإلـى مـتى وقـلوبنا في معاناه=والـخل مـايقدر عـلى شوف خله
ثـم أطـرق بـعينه ودمـعه تـبـلاه=وسـالت عـلى خـده دمـوعه تبله
تـسمع تـنهاده وتـبكي من بكاه=كن الحزن وسطه سكن وإستحله
ياليتني من دونه ودون ماجاه=حــرام مـثـله دمــع عـينه يـهله

سعد السمين

اصايل معجب بهذا

[سعد السمين]

رساله وصلتني من الأخ / جازي السمين وفيها هذه الأبيات :

قم ياسعــــد واكتب لنا عدة أبيات=حيث ان قلبــــك للمثــــايل فطيني
الصبر باح وماضي العمر قد فات=وطــــالت علي شهـورها والسنيني
ما يرجع الماضي على كل الأوقات =خذ الجــــواب اللي بصبر ويقيني
أعطيك قافي وافهم القـاف بالذات=يلي على الجــــزلات دايــم مكيني
متمكن بالطيب في كـــل حـــــزات=وأقــــولها بالصــــدق يالسامعيني
البــــارحة حسيت بالصدر حسات=مًنَ هاجــــس بالليــل دايم يجيني
ليا نامت العـــالم تسراني أشتات=هــــذا يسنــــد بي وهــــذا يبيني
مخفيــــه ما نبـــديه عن كل شمات=أخـــاف مًنَ هـرجة رفيقن بطيني

جازي لافي السمين


ورديت عليه بهذه الأبيات :

دق الجــــرس يوم الرســـاله لنا جات=وذي عـــادته يـوم الرســــايل تجينــي
من عنـــد ابو سطـــــام فيها تنهـــات=وأبيـــــات ركبهــــــا على قــاف إيني
وقــريت مافيهــا مًنَ بيـــوت جـــزلات=يالله علــى تفسيـــــرهـــا انك تعينـي
يامــرحبـــاباللي له الــطيب عـــادات=وماهـــو غــــــريب الطيب للطيبينــــي
أقـــولهـــا صــــــادق ولا لي غــايات=مثلك ليـــــاجـــــات المـــــواقف يبيني
العمــــــر يمشي والليـــالي طـويلات=وكـــل مع الأيــــــام طبـــعـــه يلينيـي
تقـــــول صــاير لك مع الوقت وقفات=وتسري مع الهاجــوس في كل حيني
من فيه منــــا مامشى في متاهـــات=ومـن فيـــــه منـــــا ماغـــــداله ونيني
كذا الحياة ظروف وصدوف صعبات=ومهــمــــا تزيــن بيـــوم لازم تشينـي
ياكثــــر ماناخذ مع الوقت سجـــات=ولا يرجـــع المـــاضي بكثــر الحنيني
تبــــي العـــــلاج أنا لقيته بالآيــــات=وخشـــوع تالي الليـــــل مع ركعتيني
وأهل الشمــاتة والحكي والدعــايات=مـاهــم رفــاقه ودينهـــم غيــــر دينــي
وختامهـــا يلي تبـــــون الشفـــاعات=صلو على خيـــر البشـــر كــل حيني

سعد السمين

اصايل معجب بهذا

[سعد السمين]

قـالــت تبــي تبطــي تهـــز الـمشـــاعــر

قـالــت تبــي تبطــي تهـــز الـمشـــاعــر=وتحــــرك إحســـاسي بكـلمـه وتغــويــه
ولـو كنـت متعـلــم.. وبالهــرج شـــاطــر=أبعـد مواصيـلك معي الســوق تطــويـه
كـلـه على شــــاني لجهــتـهـــا أناظــر=وأنـا بصـــراحـه هـاجـسـي فيـه مـافيـه
لـكـن َضحكت وقـلـت ليــه المقــاشــر=حنــــي على قـلـب كثيـــره طــــواريــه
وقـلـت إرحـمــي يـابنت مـاني بغــادر=قاســي يـدور شـي من شـــان تــوذيـه
أنــا وحيـــد وفـي رحـــى وقـت غـــابـر=عجــزت ليــالي الـعـمــر تقــدر تــداويه
ذقــت الهــوى فتــره على يـديـن سـاحـر=عيــونه بحــر والــرمش يرسـم مــوانيه
صــوته عـليـــل ومنـه الصــدق ظـاهــر=وفيه الحــــزن والهــم بـانـت مـــواريـه
قـالـت صحـيــح ! وقــلــت بالله نـاظـــر=الحــزن في وجهـي مـاهــو بـايـنن فيــه
وأنـا بصــراحه أشــوف كـلك مشــاعر=وصعبـه تشـوف إنســان مثـلي وتخليـه
قالت أقـــــول.. قـلـت إيه..قـالـت تكـابـر=ودك عـلـى ممن كـــان مـــثلي تخـــاويــه
وأنـا بصــــراحه ِحلمـي إنســــان قـــادر=يمـشـي عـلـى كيـفـي وكـيـفـي يـمشــيـه
قلـت اطلبــي واللــــي تـبـيـنــه أوامــــر=واللـي على بـــالك..لـعـيـنــــك نســــويــه
قالـت كـذا ! قلـت إيـه .. بـس أنت تـآمـر=وهـــــذا الـــرقـم واللـــي تبـيـنـه نـلـبــيـه
وأقفيت من عنـده وأنـا أقــول حاضـــر=حطيـنـــيّ بـقـلـبـــك وقـلـبـي يـراعـيــه
ومـا فــات نــــص الليــــل إلا ياســـاتــر=جتنــي الرســـايـل منـه يشكـي ليــالـيــه
قـالـت الـوووه وقـلـت هـاتــوا الدكـــاتر=جـاني بـلا وتـرى السبب منهو أحاكيـه
مـاهـي الـوووه اللـي على البـال خــابـر=ولاهي الوووه معيـض وعبيد وطميـه
ألـووووهـا شــي عـلـى الـقـلـب خـــــادر=ودك تنــــام ويضيـع النـــوم راعـيــه
وقـالـت أحبـــك.. وإضحكت.. قلت خـابر=لـكـن ســؤال الحـب وش هي مــواريـه
قـالـت يـاعـمـــــري الحـب كلـه مظــاهر=خــذ منـه مـا يعجـبـــك وإتـرك بـواقيـه
مـا تـــدري إن الـحـب كـلــه مخـــاطــــر=دربـه طـــويـل وشايكــــات مســــاريـه
قـلت إسـكتـي بعـض الهـوى شـي نـــادر=بلســـم حيــاة وكــل عـطشــان يــرويـه
مـا جـيـتـك اقـــــرأ من كـلام الـدفـــــاتـر=أنا مشيت الـــدرب وأعـــرف غـداريـه
قــالت عـلامـك ؟! قـلـت كـنـت أتـظـاهـر=قلبــــــك تحـدانـي .. وقبلـت بـتـحـــديـه
وأنـتـي عـلـى فـكـــره عـديـمــة مشـــاعر=والــحـب مثـلك صعـب تفهــم مـعــانيـه
ولـو كـــان شفـتـي العيـن يمـك تـنــــاظـر=قـلـبــي يســـج بــواحـــدٍ مــا تـســـاويـه
والقـلـب في غيـــــره حـلــف مـا ينــاظـر=لا أنـتــي ولا مثــلك تحــــرك ســوانـيـه
الحـب صــدق إحســاس معنـى وظـــاهـر=وجــروح تنـزف في خفـوقك وتكـويــه
الله يـعـيـن الحـب وشــــلــون صـــابـر=والنـــاس هـذي تشــوهـه وتِـــدعـي فيـه
سعد السمين

اصايل ,اللحالي الغيداني معجبون بهذا

[سعد السمين]

يانفسي اللي كل ماقلت هدت

يانفسي اللي كل ماقلت هدت=والحزن فيها خف ماخف للحين

أربع سنين وقبلها عشر عدت=يالله على بعض الحزن انك تعين

بأسباب منهو فيه الأيام صدت=وحنا على ماقدر الحي راضين

ليا حل له طاري دموعي استجدت=لو كان ماودي على العالم تبين

وليا ذكرته دمعة العين ندت=من يمنعك يا دمعتي لا تسيلين

لكن عسى منهو له الخلق مدت=يدينها تدعيه بالعسر واللين

يلطف بروحٍ يمه أقفت وشدت=ويجعل مكانه عنده بوسط علين
سعد السمين

اصايل ,اللحالي الغيداني معجبون بهذا

[سعد السمين]

عبـر الأثيـــر

عبـر الأثيـــر أبعث تحيـات وأشــواق=تعبيـــر عـــن حبـي وزود إشتيـــاقي
ودي أشوفــــك لكـن الجــــو مـــاراق=يلي ملكتــــي القــلب بإسلــوب راقي
حبــــك تعــــدى بداخلي كل اﻻفــاق=حتـى لحــب النفـس للنفــس فــــاقي
ماحد لعيني غيرك من البشر لاق=والقـــلب مــاهمــه لـــــو الكـــل لاقـي
وقلب يحبـك مايبي لغيـرك عنـاق=لـــو كـل قـلب له نــوى بالعنـاقي
وأنتي قريبه ما أذكر إن الصدر ضاق=لـكن إذا أبعـدتي على طول ضــاقي
الله ﻻيكـــتب على قلـــــوبنا فــــــراق=ويجمع شمل منهم شكو من الفراقي

سعد السمين

اصايل معجب بهذا

[سعد السمين]

جـتني رسـالة كـلها حب وإعجاب

جـتني رسـالة كـلها حب وإعجاب=مـدري مـن المرسل ولكن جميله
فـيها غـلا وفيها حلا ونصها عتاب=وسـؤال وش ذنب القلوب العليله
إنسان عنده وصف وأسلوب جذاب=يشكي من اللي وسط قلبه يشيله
قـلت تعرفني قال من بيت بكتاب=وبـيتك ذبحني بكل شكل ووسيله
غصت به عيوني وغرقت به أهداب=وأنا أول أحسب دمعتي مستحيله
يـاليت دايـم تحسب لغيرك حساب=وش ذنب قلبي تسهره كل ليله
قلت العذر منك ومن كل الأحباب=قـلـبـي إذا عـبـر يـضـيع دلـيـله
ومثلك يعرف القلب لاصار منصاب=لــو يـنصحه راعـيه مـافيه حـيله
وشـكلك ضحية حب صادق لكذاب=ومـثلي مـن أسـباب المحبه قتيله

ســـــعـــــد الـــســمــيــن

اصايل معجب بهذا