دمعة الباكي ودمع الضاحك - سعد ناعم السهلي

[اللحالي]

اضربي بسيوف جورك واطعني برماحك=الله اللي قدّر احوال الملا سبحانه
غرّدي حول الحما لاترفعين صياحك=واتركيني في دجا ليلي وصمت احزانه
ماتساوت دمعة الباكي ودمع الضاحك=قالها اللي هلت دموعه على صدقانه
ماعشقتك وانتي اجمل ماعليك وشاحك=ياضمير الخوف واحساسه وصوت الحانه
ادري ان الويل والنكبات عقب مزاحك=وادري ان الموت مسرج مهرته واحصانه
دامت اسهام المنايا في بلاد افراحك=اغربي مالي هوا في عشرة الفتانه
ان ضويتي بالسعاده شالها مسراحك=ياوصيفة مثل قارون الشقي واقرانه
الامل مصباح دربي لاانطفا مصباحك=استنير بحكمة الباري وفيض احسانه
عندي السبع المثاني فوق حدّ سلاحك=حرز من وحي الكتاب اللي صدق برهانه
والسباع اللي تعاوت لي وانا بمراحك=استعين الله عليها لو بقت سهرانه
من هو اللي ماتلوّع في مهب ارياحك=من هو اللي ماطرقتي بالشقا بيبانه
مقصدي منك السلامه قبل احوز ارباحك=والطمع في طاعة اللي نسأله غفرانه