النّحل واسراب القطا

[اللحالي]

يـاللـه يلي تعلم أسرار القلوب
جيتك وأنا همي على قلبي سطا

همّ الحياة إللي مضت مثل الهبوب
أعمالها - جمعتها - صح و خطأ

أتوب وأرجع للخطأ وأرجع وأتوب
وأعيش من رحمتك في ستر وغطا

مازلت تسترني وأنا كلي عيوب
أزريت أغير وضعها رغم البطا

أهيم وأسرح فالشمال وفالجنوب
مرّه على القمة ومـرّه في الوطا

عيني على البرّاق في غر النصوب
من يوم أشوف البرق حثيت الخطا

كل الدروب أحلام وأوهام وهروب
إلا طريق رضاك ياجزل العطا

يارب تهديني على خير الدروب
يامن هديت النحل وأسراب القطا

وأرزقـني التوبة وغـفران الذنوب
وشفاعة أفضل من على البيدا وطاَ

صح لسان شاعرها لا أعرفه لكن كفو عليه بهالأبيات