![]() |
#1 |
مالك الموقع
تاريخ التسجيل: May 2014
المشاركات: 6,534
|
![]() الموجز اللي ضافني تالي الليل=ما شفت به يابو محمد حمايد غير إنّه أصحاني من النّوم تعليل=وصار السبب في ركعتين وسجايد وبعد طلوع الشمس شفت الأزاويل=اللي حشد بالقرب واللي محايد وبديت يا عويّض بزينة تماثيل=قصيدةٍ تحسب بضمن القصايد والبست رجلين القصيده خلاخيل=وقلت ارقصي مع ناقضات الجعايد ما عاد فكري باقين لك زهاميل=أغزي على الأسماع حلوة نشايد إمّا خذيتي من هل العرف تبجيل=ويطلع لك بما تحتوينه شهايد وإلاّ ذلوف اللي وقع بالمحابيل=مع غفيته في موجعات الهجايد ماشوف لي مِنْ سَمْك بيتك محاصيل=ولا شفت فلواتك وحاد الهدايد قبلك قصايد مجزلين الأقاويل=في ما يسرّ المجتمع بالفوايد على البسيطه بالمنافع جماميل=وفي عون خالقهم جزال الحمايد و سلاحهم سلطانهم بالتّواغيل=ومن واقع التّطبيق صاروا روايد ناس(ن) تمادوا للفضاء بالتجاويل=وأنا على البيداء بقيت الشّرايد من كبر عمري صار ما بالجسد حيل=وحجزت مع قايد رحيلي وعايد واسلم وسلّم لي على سايس الخيل=ابن عبيّد وأنت نعم الفهايد قل يا مساعد شايب(ن) طفّح الكيل=وجانا بصفصاف البيوت الفرايد وأنا بقول القطن يلقط سماليل=والحلق يغثّه شموم الغدايد وأنتم تعرفون اجتهادة شرحبيل=يوم الغذاء خبز الشعير وثرايد واليوم من بحر العرب نارد النّيل=مع جوّ وإلا مع سريع السّوايد حتّى ايش لو في مجتمعنا قلاقيل=ومن غشغشتهم شايطات الكبايد ردّ الشاعر : عويّض محمّد الغيداني موجز ومنه تشيل وتحطّ وتشيل=ما هي لكم يا شيب سلمى عوايد تركع وترفع بالرّموش المهاديل=وما تطلبه من فضل ربّي بزايد إن باج نور وشفت منه المخاييل=وتصوّر إنّك بين مفلس وصايد الكحل عزّ(ن) للرّموش المضاليل=وإلاّ أنت لا صايد ولا انته بفايد عن ما بها لو لمّحت لك من الويل=يا زين عنها منك بعض الوسايد عليّ لا ترمي ببعض المواويل=مثلك حصيلي من عتبهن نكايد للرّجل سير حجول ما هي مفاتيل=يا ملوّنن كرعانها بالحدايد ذولي بهن مقفي وذولي مقابيل=شرد(ن) أطوّعهن على كلّ كايد ما شفت في جيلي وجيلك ولا جيل=إلاّ رموز أعلام ما هي جرايد منها عن الماضي مواقف رياجيل=ما عيّدوا بسلومهم عيد عايد بحدب السّيوف ودون حرش العصاقيل=كم ناحت الطّرقى من القوم قايد هذا مناسبهم بكلّ التّفاصيل=وهذا حصيل البيت من بدّ بايد ما يلحقونك حرب بالقال والقيل=لو هم هل الطّولات خصم المكايد ولا ترخي الهمّه تشوش المهابيل=أكرب رشاك وخلّ عنك العقايد وحط المقامه للرّشا والمحاحيل=واسقّ الضّوامي من زلال الرّكايد خلّ الفضاء لهل الفضاء والبلابيل=ومردّ روّاد الفضاء رون سايد يعني بعكسك لاتّجاه الدّرابيل=تبقى زبونن للتّعب والنكايد وأذيال جرب القوم دايم مشاويل=ولا يعترض للجرب غير البلايد ونزل المطامن فيه لا تامن السّيل=ما ينزله يا كود راع الرّدايد ولا لي على مساعد ببعض الأقاويل=حرّن ذلوله برقبتها قلايد عن دربها ما ردّدوها الدّلاليل=مفتكّها وقت الرّخاء والشّدايد ولانته بشايب شيّبت بك بهاذيل=يا سعد من جالك من الضّيم عايد ردّ الشاعر : مساعد عبيّد الغيداني الشّايب اللي لا ارتكى طفّح الكيل=جانا بصفصاف البيوت الفرايد كنّه مفصّلها على الجرح تفصيل=ماني بمستغرب وهي له عوايد أهلا هلا به عدّ وبل الهماليل=وعداد ما هبّت هبوب النّوايد وعداد ما غنّت طيور البلابيل=وما جابت الورقى بهدف الجرايد نجمٍ لمع بالجيل الأوّل وهالجيل=منه استفاد اللي يحبّ القصايد إمداعبه إمداعب الرّمش للميل=وقساوته سيفٍ يقصّ الحدايد إلى بغاها فنّ فنّان تشكيل=وإلى بغى الصّعبه رقاها سنايد إن ساقها تنساق مثل الفناجيل=وإن قادها ينقاد للشّعر قايد وإلى سرح سرحه بعيد المداهيل=وإلى ورد يارد على نبع زايد ما قلتها قصدي تصنّع وتمثيل=الشّاهد الله يا وسيع البنايد اللي نصر عبده بغزوة هَلَ الفيل=ما لي طمع بالمدح وإلاّ المجايد يا مزلزل الأحرف بزين التّماثيل=أنا على ساقتك ما لي فوايد هنا بقى موجز ويحتاج تحليل=والعذر منك ومرضي النّاس كايد جانا العجاج اللي يقشّ المحاصيل=واجتثّ زرعي قبل وقت الحصايد السّاحق اللي لا صفق ما هوّ حليل=اهبّ ما خلّى لجمعي شرايد رحنا على دربه سوات السّماليل=من يوم ثارت منه ماني بصايد كمّل على ما يطلب الشّرح تكميل=بالعرف علاّمه وبالشّعر رايد ما ينطحه يا كود من ينطح السّيل=واللي سواتي عن ضفافه يحايد أخاف يطلع عن مجاريه ويعيل=أو ينصدم بالسّدّ ويجيك عايد الموجز اللي ضافني تالي الليل= خلّاني أطلع وانتظر (أوف سايد) وبعد وصول مردّ ابو رامي اضفته وقلت أنا يابو رامي طرقت المهاجيل=وركايبي ما عاد فيهن فدايد ترايعن في وادي(ن) نبته أكليل=مسقيه جرّاف الغثاء له زبايد ولولا القلم وجهود خمس الأناميل=في وقت مال الكمبيوتر رصايد كان انكمش فكري وضاع الضّمحليل=ولا شفتني معكم بهدّ الهدايد لكنّكم في شايحات المناويل=سقتم سبب مع مرزمات الرّعايد حبايبي الجميع البيتن الاخيرات يعرفون قصدي فيهن هالحروب وسلامة الجميع
__________________
لا إله إلا أنت سبحانك إنّي كنت من الظّالمين |
![]() |
![]() |
الذين يشاهدون محتوى الموضوع الآن : 1 ( الأعضاء : 0 , والزوار : 1 ) | |
|
|
![]() |
||||
الموضوع | كاتب الموضوع | المنتدى | مشاركات | آخر مشاركة |
تفسير سورة الّليل لابن سعدي | اللحالي | القرآن الكريم وتفسيره | 2 | 03-07-2016 12:11 AM |
الموجز البديع في الصلاة والسلام على الحبيب الشفيع ﷺ موضوع قيّم فيه تفصيل معاني الصلا | جميل2006 | هدي الحبيب | 0 | 09-18-2015 04:44 PM |
سرى الّليل - حمدان آل مكتوم | اللحالي | مختارات من نبض المشاعر | 0 | 08-15-2014 04:38 PM |