حطّاب ليل

[اللحالي]

حَطَّاب ليل وْلاَ لِقَى بالخلاء فاس
والبَرْد بِضْلوعه مْسَوِّي سوايا

في ليلةٍ ذيبه تعشَّى من الياس
حتى شبع من شامخات النوايا

العمر قَفَّى وابْيَض الشيب بالراس
ماعاد باقي من سواده بقايا

حافي قِدَم يَمْشِي على حمْر الاطعاس
و يصيح خوفه مِتِّقي بالحنايا

يِرْقِب على قَبْرٍ بعيدٍ عن الناس
ويِفِزْ له فزّ الكرم بالطنايا

يلقاه في سَمْعِه وشوفه والاحساس
و الروح ودْموعه لِفَنِّه، هدايا*

غلاه يَسْري به معي وقت الادماس
أسري معه واحْيَان يَسْري معايا

وسْوَسْت فيه وصاحبه كل وسواس
حتى لقيت إن البدايه زوايا*

كان الأمل في همتي شِدَّة الباس
و اليوم ذا أوّل عزاء في عزايا*

مَرَّت ثمان سْنِين ياعَلْقَم الكاس
أبَشْربك لوكنت تَجْرَح حشايا*

إجْرَح مدام الجِيْد يَبْكِيه الألماس
أبَنْتِحِر بك لو سقاني ضمايا

ضِمِّي عذابك يامعاناة الانفاس
وردّي على نسمة هبوب الشفايا

طعنتني ياوقت في رمح جساس
ومات الخفوق اللي بجرحه وصايا

ياقلب صَبْرك يعتزي فيه الافلاس
ماجور لو مافيك ذنْب و خطايا

هذا قِدَرْنا نبني السَّاس لَلسَّاس
ونَرْحل ويبقَى في غموضه مزايا

عيادة_الجهيلي

أيوب ,اصايل معجبون بهذا