على يمينك

[اللحالي]

لا تعترض في سيرتي يا محيميد=مانت الوحيد بما تمدّ الأيادي

على يمينك من يصارع لواهيد=وأنت السّبب يا محتزم للطّرادي

تبي تخمّ الطّيب وتزيد وتعيد=وتكرر العودات بالأزتيادي

ما هو على كيفك كفيت الحواسيد=أنا سليل ملاعبين الهنادي

يوم العصور بحال شدّ السّواعيد=للخيل سرج وللمطايا شدادي

لليوم دايم عن بعضهم نواشيد=وعليّ أنا بالذّات لهم رصادي

لو يسمعون إنّي ضعيف المهاديد=جولي سكارى نجد بالأنهدادي

وأروح ضحيّة غيادين في عيد=ويصير قطف الرّوح ساعة عيادي

ثم وش يفيدك من فعول المقاريد=وأنا خويّك وابو فيصل يلادي

يابوك حنّا بين خلقن شواهيد=ومكشاتنا برفوق ما هو أهتبادي

ونعرف حيلاتك وسبك التّماهيد=والصّبر له حدّ ويبتّ القيادي

ومثلك لنا في بذلت الطّيب تشييد=وأنت تعرف غيدان بالاشتيادي

وتعرف ابن وايل ولافيك تنويد=ما يأخذ نعاسك براسك نيادي

وأنا يا ابن راشد بديت التّواديد=ومراعين خالد بكلّ الودادي

خويّنا توصف عليه الصّناديد=يا حيّ ابن منصور علمن وكادي

الوايلي ما يلحقنّه مناقيد=على ما قالوا من طيور الهَدادي

يا حيّ أبو فيصل أمير الأواليد=من غير قاصر فالكرام الجيادي

وكانك يابو فارس تجيد التّهاجيد=في ماضي سنينك وباللي جدادي

هدابيّات الشّام لو هن مقاييد= ما برّكن بحمولهن بالحمادي

جن من دمشق الشّام مع جرهد البيد=يبنّ مكّه حاملات العتادي

ويمشون معهن حاملين البواريد=ما همّهم لو المسير متمادي

في ماينات أحوالهم والتّحاشيد=مثل الصّقور مشعثرات الثّنادي

في وقتهم من جودهم بالتّساديد=يوم الضِّوي تشعل بقدح الزّنادي

واليوم حنّا في شريعه وتوحيد=ونبذل من المجهود ونقول عادي

وكان أنت يالعوفي طموع التّواجيد=وطبعك بمزروع الكرم لك حصادي

مانت الوحيد اللي دفعت المفاريد=للمغترات مفتّخات الأيادي

وأنا ماجبت السّالفه لجل تشويد=لكن تورّيت استبيح العنادي

معيض الضعيني ,اصايل معجبون بهذا