يا بحر .. محمّد لطيّف

[اللحالي]

يابحر جده ياعذاب المحبين=يامدعي طبع الهوى والسعاده
بيني وبينك حلف حسب القوانين=والغدر ياهدار يعلن فساده
بعشره ثلاثه عام سته والفين=رقم ثلاثه جيم تقسيم صاده
تحت اسم صلح البحر والبلادين=وقعت انا وياك عقد وافاده
فحواه كله يندرج تحت بندين=اعيدها لك كان تبغى اعاده
البند الاول واضح بالعناوين=حسب الشروط المرفقه بالشهاده
من يوم عشره لين سته وعشرين=هدنه وكلن عايش في براده
والبند الاخر نخفي الزين والشين=وكل على ماقيل ياخذ مراده
وباركت لي يابحر بين الصلاتين=وصافحتني واعلنت نية سداده
وطلبت لي شي يبل الشرايين=وطلبت لك فنجان سكرزياده
واليوم اشوفك تحترق بين نارين=تقفي وتقبل لي على غير عاده
من وين رايح وين رايح على وين=تعال عندي ياضعيف الأراده
ماني مسيحي من جنوب الفلبين=ولاني بحكمتيار شهيد زاده
ولاني من البشمر ولاني من الصين=ولاني كمال حسين حمدي حماده
اسمي محمد وايلي من هل الدين=وكل حسب حريته واعتقاده
انا من الشملي شمال الجبلين=داري وكل يفتخر في بلاده
ديرة بني وايل كرام وعزيزين=اهل الكرم واهل الفخر والرياده
يومنها بالسيف والرمح ذربين=عدوهم يعاف لذ الوساده
ربعي وليا نخيتهم جوك عجلين=كلن يكاهز فوق صهوة جواده
ناس على شقر الاصايل سلاطين=مثل العقاب الصيرمي في هداده
على ظهور الخيل مثل المجانين=ولا حولو رمز الوفاء والرفاده
منهم عقاب الخيل ذعر المعادين=والشيخ ساجر يستحق الاشاده
والشيخ بن هذال راع الدواوين=شيخ الشيوخ الصيرمي في طراده
ومنهم مريبد من زحول العداوين=عقيد ربعه يوم هي بالنكاده
ومنهم خضير اللي رجح بالموازين=من رد بسهوم العباريد صاده
ومنهم مصوت بالعشا والشعالين=الموت عند وجيهم واهجاده
ومنهم غدير الموت والناس دارين=كم راس شيخ بالميادين باده
اعطيك نبذه والمعاني نياشين=من كثرهم عجزت لوفي عداده
لاشفت فوق الورك اليمن هلالين=تراه سيف الموت يعني حصاده
نيرانهم تاتيك مثل البراكين=لاشذ سلطان الهدى عن رشاده
ركبوا على قب سواة الشياهين=وعقيدهم علق وسام القياده
النادرين القاطعين الميامين=مال للعدو في وجه الابطال راده
طشوه بوجبه الذياب السراحين=واركوا على ارقاب المعادي حداده
سربة هل البلها تدك الميادين=يهتز منها اللي قوي فواده
الخاشعين التايبين المصلين=يرجون مد اللي كريم مداده
للسيف غمد وللبطوله عناوين=وحنا عناوين الفخر واعتماده
وان كان عندك يازرق الموج قولين=يغنيك عن شعر المعنى وكاده
فلا تهددني من اللحين للحين=بالموج واسرار المحيط وعتاده
ولا تحداني بياليل ياعين=الليل ليلك موحش في سواده
ابوك انا شاعر وعندي براهين=اكتبك في سطرين واعلن جهاده
طيار بحري واعرفك يابحر زين=عندي على علمك ختوم وشهاده
السيل شعري والقصايد ميادين=والقاف فكري والمعاني زناده
لشرشحك من حد جده لبكين=وعلمك وشلون معنى القراده
لرسمك رسمة راسمين الكراتين=واعلنك رمز المهزله والبلاده
والله لاضحك عليك الوراعين=حتى اللذي توه حديث الولاده
ويسفهك حتى لابسات الفساتين=وتصير بعيون الغنادير داده
حتى العجايز تحقرك باللواوين=وماللك مع الشيبان غير النقاده
مابك حلا مر تعل المصارين=طعمك هماج يقطع القلب ساده
من ودني يبشر بطلق الحجاجين=ومن لابغاني نور عيني بعاده
ياهيه انا ماني ضعيف ومسكين=عندي مع الايام صبر وجلاده
ماجيتك اشكي من عذاب المزايين=حصه وسلطانه وليلى وغاده
ولاجيتك اشكي لك من الفقر والدين=الحمد للمعبود رزقي هواده
تشوف هالدنيا بلاد وحياوين=عند الولي ولا تساوي جراده
اعوذ به من وسوسات الشياطين=والوذ به عن حر يوم الاباده
والرابح اللي لاغدى الليل ليلين=يسجد ويدعي بالدجى بانفراده
وهاذي نصيحه حطها بين قوسين=تغنيك عن كثر الكلام وسداده
الغدر يحرق يانعات البساتين=والصدق ياهدار نصف العباده
وان ما عجبك الهرج لاتشكي البين=ياموج رح راجع طبيب العياده
وختامها صلوا صلاة المصلين=على النبي الهاشمي في مهاده

للشّاعر / محمّد لطيّف العنزي

اصايل معجب بهذا

[اللحالي]

صح لسان ابو فيصل

وللجميع اقول ان هناك في قسم قصّه وابيات موضوع عن هذا الشاعر

بعنوان ؛ اللحالي واخوه العنزي ؛ من اراد المزيد من التعرّف فاليقراء الموضوع هناك
وللجميع ؛ تحيات اللحالي الغيداني . بالجميع ياهلا

[اصايل]

صح لسان الشاعر والناقل

دمت في حفظ الرحمن

اللحالي الغيداني معجب بهذا

[اللحالي]

صح بدنك يابنتي والله يفقك التوفيق الحسن واخوانك المسلمين

مشكوره أصايل