خلاصة تجربة

[اللحالي]

‏​أمزح ولكن خل مزحك في حدود=ومن لا يحب المزح لا تمزح معه
المزح بعض أحيان مروي للكبود=لكن ليا من زاد ضربه موجعه
واتْعب على خوّة عريبين الجدود=اللي معك فالضيق وإلا فالسّعه
واحذر تعاشر راعي القلب الحسود=اللي ضرره أقرب لك من المنفعه
وأبعد عنِ مْخالط مبيّحة السدود=واللي على نقل الحكي متجمّعه
خليطهم إن ما ورد همج العدود=وإلا سمع شيٍّ ما ودّه يسمعه
واليا عطيت إنسان ميثاق وعهود=خلك وفي وادفع كثر ما يدفعه
ولا تقابل راعي الطّيْب بجحود=واحذر من اللي طيبها تتصنّعه
وإن شفت طبع الظلم فالعالم يسود=احذر من المظلوم لا هلّ أربعه
له دعوةٍ لا من دعا ترقى سنود=ومن صابِته دعْوَتْه ما طاب وجعه
وإن شفت من نظرات أقاربك الصدود=حبل التواصل بينكم لا تقطعه
واصبر ولو ما أنته عليهم بمحدود=بكره تبي تحصد ثمر ما تزرعه
واعلم بأن الودّ لو صابه جمود =شمس المحبة تصهره وتميّعه
وإن سآل في مجراه وأروى كل عود=أخضرّت أوراقه ولانت أفرعه
واليا طلبت وصال ناقضة الجعود=دوّر على اللي بالحياء متشبّعه
واظفر بذات الدين من حمر الخدود=يلقى بها قلبك مناه ومطمعه
واعلم بأن العمر ينقص ما يزود=واللي يفوتك منْه صعْب ترجّعه
ولا تنْظر لماضيك لأنّه ما يعود=فكر بحاضرك الجديد وسنّعه
وابذل عشان أحلامك أضعاف الجهود=وباب الأمل بين المحاني شَرّعه
وأثْبت لنفسك بين خلق الله وجود=ودوّر على اللي قَدْر نفسك يرفعه
وإذا فتَر عزمك وحسّيت بْبرود=حفّز خفوقك بالطموح وشجّـعـه
نفسك بيدك تْقودها للعز قود=وتارد بها عدٍّ قراحٍ منبعه
وهذي خلاصة تجربة عدّة عقود=وبْخط وافين الخصال موقَّعَه
مضمونها يروي معاطيش الكبود=ويلقى بها العاقل مناه ومطمعه

للشاعر سعد ابن جدلان

همس الآيام ,اصايل معجبون بهذا

[اصايل]

صح لسان الشاعر والناقل

كل التقدير

اللحالي الغيداني معجب بهذا

[ابو مناحي]

قصيده جزله ورائعه
وخلاصة تجربه فعلاً
صح لسان الشاعر سعد بن جدلان
وشكراً لك ابو سلطان على النقل الرائع والمميز
بيض الله وجهك ولا هنت
ولك تحياتي وتقديري

همس الآيام ,اللحالي الغيداني معجبون بهذا

[اللحالي]

شكراً لكم مدراءنا الغالين

المنتدى هذا والله ماهو بسيط
ثلاثه مدرى والله مانتم بسيطين ياحرب
حربي وحربيّات ؟؟؟
ــــــــــــــــــ

اصايل
ناصر

مشكورين ع المرور الرّائع

اصايل ,همس الآيام معجبون بهذا

[همس الآيام]

صح لسان شاعرها وسلمت يمين ناقلها

كل الود والتقدير لك على اختيارك الجميل

[اللحالي]

مشكوره يابنت اخوي؛؛؛؛ همس
على المرور الرّائع والاشاده
الجزله من الجزله

ايوالله صح لسان ابن جدلان
على الكلام الواقعي