[اللحالي]

قصيدة من الشاعر حنس بن سلمان الطويلعي العنزي

البارحه ياحسين مـاجاني النـوم
والقلب كنــه ينشوي وسـط مله

صبري نفذ ماعاد باقي ولا يــوم
وياحسين يمكن ينفذ الصبر كله

مادام عبدالله في الظلم محكوم
يــاصبر عبـدالله. على مـاحصـله

ماله خصم ياحسين بين ومعلوم
خصمه خفي ياحسين وشلون ادله

بالظلم سوو له سواليــف وعـلوم
ومجنـبيـن الحـق يـاحسـيـن كـله

لادانتــه وضعـه مرتب ومرســوم
واللي تديـر الوضع يـاحسين شله

يابوعبـــدالله يــازبن كل مضيـوم
يــاحسين .عيــوا يــقبــلون الادله

يبون راس الذيب والوضع مفهوم
والذيب..مـاتـرضى عليـه المـــذله

ذيب عنزه عن الرديات محشــوم
وفعـــله يبين ماكتب في سجـــله

والطير لو هو بالسما يدرج الحوم
ينــزل على اللي ربــنــا كاتــب له

ياحسين عطنا الراي ياخيرة القوم
رايك يـابن هنـدي وانـا مصغي له

حنس سلمان العنزي


عزاه يـا طـرفٍ مـن النـوم محروم
والموق واطرف الجفون اشبهن له

ولايلام منهو يشكي السهـر مكلوم
معذور .لوصــار .السهــر عــادةٍ لـه

جالك يابـو نادر هواجيس وهمـوم
والجمـر يحـرق فـي قدم واطيٍ له

ولاهوب ضعفٍ فيك للمجد زيـزوم
لكن نـظــام اقيادتـــك.خـاضــعٍ لـه

حنس بـن سلمـان. قــرمٍ و شغمـوم
مـن روس السعيدان نجــومٍ. مطـله

اجهدت. في مسعاك ما يلحقك لوم
ومثلك كفـو في ما قفـك محتـمٍ لـه

و عبدالله اللي صـار له شي مقسوم
مــن الله المـعبــود و مـســجـلٍ. لـه

بــالظـلم. حطـوا له ادانـات وعلـوم
حرّف. بهـا اللي مـا يـهـــاب المظله

هذا القدر يمشي على العبد محتوم
المـؤمــن يــؤمــن فيــه ومســلمٍ له

والسجن كم واحد دخل فيه مظلوم
يـوسـف ولد. يعقـوب قبله دخـل له

وراع الصبـر مـاجـور ويـزيـد بعـزوم
الله امــــر راعـيــــه ومــبــشـــرٍ لــه

وحقك عليـه يـابيض الوجـه ملزوم
آمـر وانــا اللي تــامــره طــايــعٍ لـه

حسين عبيدالله بن هندي