[اللحالي]

يا ما حلا مــع فجَّــة الصبح. دلَّه
والنار يسبق ضوهـا شعّــة النور

في مجلسٍ. مـن يدهـله. مـا يملّه
وسوالفٍ بين الرجـاجيل بـالدور

ان جاب. واحد. علم ذا منصتٍ لّه
مافيهم. اللي يقطع القيل ويثــور

صبح المطرباقي على الارض طلّه
ارض خباريهــا تقل صيفـة ابحور

وسحبٍ. على شبه. الجزيره. تعلّه
وكلٍ يقول القاع مِخْضِر وممطور

وادي الرمه يمشي و مثــله بَرَن لّه
وديـان يـرقى سيلهن. كـل عثـمور

والارض. خضــرا و النفــل فايحٍ لّه
ريحٍ غلب ريحه على جملة اعطور

فيــه ام سـالم تـرفـع. الصـوت. كلّه
قامت تهجرس صوتها فوق واحدور

وفيـهــا الزبيـدي يـا حلو فقعــةٍ لّه
زودٍ على طلع السهل شيف بالقور

ارضٍ بــراحٍ.. خــدهـا.. مسـمهــلّـه
تشوف مد الشوف من دون ناظور

ترعا. بهــا. حرش. العــراقيب. فَلّه
ماعندها. شبكٍ. ولاصوت. ماطور

مــافيــه. شبـكٍ بالمسا. يرجعن لّه
يرعن هَيَت حتى الصبي نَزَّل الكور

اليارْزِمَــن. اصغـارهـن. ارْزِمَـن لّه
حيرانِهن. معهــن. ولا فيه. مَقْهور

و معهن فحلهن لاخذن. ينظرن لّه
يتلي. عشايرهن سنامه تقل طور

شمّخ اذراهن. و الوبر جاء. محلّه
و بــر جـديـد و صارنـورٍ على نور

وضحٍ. كما. لون. البرد.. يشبهن لّه
يزهن. دباديبٍ. على الحلق مديور

الياشرقت شمس الضحى ناطحن لّه
وحـده.. تطـــق. بخفهـا. لبَّــة الزور

ثــم. وقفـن. لعيـالهـن. وعطـفـن لّه
وقـادن. على مشهاتهن. تقل طابور

وتسمّـعن. صـوت. المدوه. وجن لّه
لا شاف مرح اصغارهن صار مسرور

و صلوا على الهادي. على خير. ملّه
محمـــد. اللي. سنتـه خيـر دستــور

حسين عبيد الله بن هندي