يـاالله بـنـوّ ٍ لانـشـاء كــنّه الـطـود=غيثٍ من المـولـى ورحـمه سـريـعه
مزنٍ من المنـشـاء به بـروق ورعـود=وبـله حـقـاق ونسنـسة له مـطيـعه
شرقـيةٍ تـفرق عــلى باقـي النـود=تقهر سـحـابه فوق نـجـد الوسيعه
بامر الـكريم اللّي عـطـاء أل داوود=ملكٍ عـظيم وخـير نـهـج وشـريعه
يظـفي عـلى كـل المـداهيل ويـزود=مـن منفذ الدرّه الشـرق الـوديـعه
ماحـده الديّر عــلى جـو مسـعـود=يــفرق عـلى كـل المـواقـع ربـيـعـه
دارٍ سهـجها بالـقدم لـيـّن الـعـود=بيـن النفود وبيـن رجـم الرفـيـعه
مدهال خشف الريــم مربـاع للذّود=الله وهـبهـا من جــمال الطـبـيـعه
ريح النفل يفرق على الشيح ياسعود=عـنـدي وكـلٍ لـه مـزاج وطـبـيـعـه
وجـدي على وقتٍ مضاء دونه اعـقود=اعـيش يـومي مـاحسيت التبـيعـه
والـبيت بالمــرباع يـبنـنه الــخــود=بيض العـذارا يالـقـلـوب الـولـيـعه
زينن طبيعي واشقر الراس مرجود=ماحـطـن المـكـيـاج مـثل المـذيـعـه
بيت الشعـر يامنبع الطيب والجود=عــيّا زمــان الـعــولمـه لايــطـيـعــه
وقـتٍ مضاء ياسعود ماظـني يعـود=مافـيه بيـن الناس غــش وخـديـعه
بيض النوايا ماتـجي عكـسهـا سود=ولابـه مـشاكـل بيـن سـنّه وشــيعـه
ذاك الزمـان اللّي بـه الخـير ماجـود=بيـن الاقــارب ماتـشـوف الـقـطيـعه
والجـار له عـند الـعـرب كـار مـعدود=والبـدو رحّـل والـفـيافـي شــبـيـعـه
واليوم دور الـهـرج والـعـلـم مردود=شـبـع الثعـل والاّ الذيـابه مـجـيعـه
والصـبر غـبّه قـالـو الـناس محمـود=مـن عـيّنـه ياسـعود ماحـدٍ يبـيـعه
لاشـفـت بالموجـز صواريـخ وحـشـود=كيف الـعرب ترضى هـوان وهزيـعه
يسرح ويـمرح بالعرب عـقب نـمرود=عـارٍ عـلى المسـلـم وحرب شــنيـعـه
دنـيا كـفـا الله شـرهــا مـابـهـا فـود=يالله دخيـلك مـن زمـان الفـجـيـعـه
ياالله بنـصر منـك ياخـيـر مـعـبود=تنصرٍ هل التوحيد واهـل الشريـعه
غـصبٍ على الحسّاد وبليس ملهود=مــن دوّر المـدخــال مـاله ذريــعـه
والمـملـكـه بـحـمـاك يامرسـلٍ هـود=تبقـا بـخـير وباالحــصون المـنيـعه