( خاطر )
يالقلب وش في خـاطرك مايسليك=وشفيك ما تسقم على هـم دنيـاك
وانا على درب المـراجل مربـيك= وبوك قبلك في ذرى الطيب رباك
وانا الذي عـن طبع الانذال شاريك = وبايعك لهل العرف مثلك وشرواك
لاشك مدري وش جرى في ليالـيك= تدور في غبة فلك غير الافـلاك
ياقـلب لاتحـزن عسى الله يهـديك = خلك طبيعي وابـتسم في ثـناياك
لاترتـبك لا تخـتلف واثق فـيك= لاكن تدبـر واعتـبر في خفاياك
ابـيك لانامت عـيون تراعـيك= تسهر على القران والله يرعـاك
ادع الـولي لاقـفلن الشبابـيك= يفتح لك الوالي ثمانـين شبـاك
ناج العظيم بظلمة اللـيل ينجيك=يدمح لك الزله ويغفر خـطاياك
وابيك تشلع فـوق و تعز والـيك= وترعى الجبال النايفه علم وادراك
العلم ير فع صاحبه وانت يغنيك=يبني بيوت العـز ويعز مبـناك
وسرك اليا ضاقت عليك الدواليك=حطه بصـندوقك وصكه بيمناك
ماينفعك لاقـيل ماعاد يـمديـك=تصـير بافواه البشر تقل مسواك
كم واحد يضحك بوجهك ومغليك=ووده يجيه الموت لاحل طرياك
جحادة النعمه وجيه الصعـاليك=ادعس عليهم يابيض الوجه بحذاك
وصديقك الصادق حشى مايخليك=عن الدروب المخطيه دوم يـنهاك
واليا نسوك الناس ماهو بناسـيك=مثل الذهب يبقى ذهب بين الاسلاك
احرص عليه وقدره في مماشيك=وان مالقـيتـه تالي الوقـت يلقاك
واحذر مع الغرات تتبع هقاويك=راع الصميل وهـقـوته لاتـعداك
ياقلب جاك العلم من راس راعيك =اما احفظه والا حفظته بلياك