[اللحالي]

كما عودني احساسي نظمت من الشعور ابيات
على بحري ومـجذافي يـجـيـه المـوج ويـرده

وساعة هاجسي يصحى وفجأة يختفي ساعات
ولامـنـي. تـبـاطـيـتـه. الاقـي. دفـتـري عـنـده

على المسحوب والأطول على جررة ابـوذيات
على الطاروق والشيلة على جزره وعلى مـده

خذيت من الشعر لوعة مع حـسـرة مـع آهـات
خذيت الصبر والحكمة خذيت اليسر والشـده

و مـرة اكـسـر الـخـاطـر ولـكـن أجـبـره مـرات
ومـرة يـوقـف بـصـفـي ومـرة تـلاقـنـي ضـده

أحب الشعرمن غيري واحب اسمع صدى الأصوات
وأحب الشاعر الصادق في احساسه وانا اوده

وبطرب له وأبين له جماله بـالـشـعـر سـاعـات
واحيان السكوت أجـمـل لـيـا زاد الحـلا حـده

سبحنا في بحورالشعر وشفنا الجزروالواحات
غرفنـا من قـوافـيـهـا وقـوافي شـعـرهـا عـده

ودام الشعرمعشوقي وانااللي رحت له بالذات
بصونه واحفظ حدوده وازيل الدمع من خده

أبي اكتب كل ماشوفه بوجه الناس والعبرات
على اللي لا فتح له باب من كثر العـنـا سـده

وأنا واحد من الآلاف وكل شاعر وله لمسات
ويمكن لمستي توصل محبين الـشـعـر ورده

وبعض الناس ماتدري عن الشاعرإذا مـامات
ولكن الشعر حكمة ورسالـة ومـاهـو بـخـرده

أذا الشاعر كتب كلمة ترى في داخله كلمات
وهوأس المجالس كان في مزحه وفي جده

تحية معشـر الـشـعـار مـنـي مـاوراهـا هـات
لكم من شاعر ن عانـي بـيـرسـلـهـا مـع وده