[اللحالي]

البارحه حضر على الفكـر طـاروق
وجبت القلم بالحال ثم جبت الاوراق

وبديت باسم اللي خلق كل مخلـوق
اللي فرق بين البشر خلق واخـلاق

اللي جعل بالناس محـرم ومـرزوق
سبحان من بيديـه تقسيـم الارزاق

وسجلت مايطري على البال برفـوق
من شان ما ادون سوى كل مـا لاق

ماني بشاعر بس يجذبني الشـوق
لحل طـاروقٍ لـه القلـب يشتـاق

بالذات لاصار الهدف عالـيٍ فـوق
يبعد عن اهدافٍ تجي بيـن عشـاق

انا هـدف معنـاي للـي لهـم ذوق
ناسٍ لهم مع سامي الشعـر ميثاق

يابو بدر مثلـك مجـرب وماثـوق
بالطيب والمعروف والعرف عملاق

ولك مركزٍ في ساحة الشعر مرموق
شعرك جزيل ومعجـب كـل الاذواق

ماقلتها عاشـق ولانـي بمعشـوق
ولا شاقني مزيونـةٍ زينهـا دقـاق

ولا ناقصٍ حاجه ولاضاعت حقـوق
والصدر لو كثرت طواريه ماضـاق

قلبي من اسباب الهواجيس محروق
أخفيتهن لين احرقن قلبـي احـراق

يجي لهن في صدري رعود وبـروق
وليا استهلن اغرقن فكـري اغـراق

اسباب وضعٍ صار في وقتنا عـوق
من سبته درب السعه عقبها ضـاق

شي حدث في وقتنا ماهو مسبـوق
ضيق على بعض المشاكيل بخنـاق

باب السنع من معظم الناس مطروق
لا شـك مقفـولٍ بضبـه ومغـلاق

كم واحد جاله يسوق القـدم سـوق
وعنده وقف لين اتعب العين والساق

وعود تقول انه على الوجه مصفوق
لا وخسارة جيتـه قبـل الاشـراق

والا لراع الواسطه ماهـو مغلـوق
تفتح له ابوابه على كـل الاشنـاق

حيث ان له ناسٍ لها يدين وحلـوق
متوظفٍ كبتن وهـو قبـل سـواق

للواسطه دورٍ علـى غيـره يفـوق
يرفع مثابيـر الوطـا يـم الافـاق

دنيا تكيف قاصـر الشبـر ويـروق
بالحر له ضـلٍ و بالبـرد مشـراق

لاثمارها يقطف بـلا جهـد ويـذوق
طراوة الدنيا لهـا اشكـال وارنـاق

مايطرقه من قاسي الوقـت طاروق
من العنـا وايامـه القشـر مـاذاق

ناس تحوق المـال بيدينهـا حـوق
متيسرٍ ما حـال مـن دونـه رواق

وناسٍ يسجل دينها الطاق مطبـوق
الله يكون بعون من وضعهـم شـاق

والشجره اللي بارضها ما لها عروق
كيف الغصون تعيش وتعيش الاوراق

والنخله اللي مالهـا ظـل وعـذوق
نجثهـا ونطشهـا بالـف طـقـاق

والسلعه اللي ما لها بالبلـد سـوق
تبور لـو طافوبهـا كـل الاسـواق

ولا هو صحيح ان كل مطرود ملحوق
كم راح مطرودٍ نجا عقب الارهـاق


صح الله لسانك ي ابوسامي والله شاعر مافيك حيله ي ابن العم