[اللحالي]

الشعر اعشق كتابته عشق واهواه=نظمه يونّسني و يبعد همومي

نديمي اللي كل مأحتجته ألقاه=لاطار من كثر الهواجيس نومي

وان صنّف سلاحٍ فأنا اعد مرماه=دفاع مأعتبره سلاحن هجومي

أليا عـترض مـقرودٍ ابليسه اغواه=شغله يدوّر بالرّجال الثّلومي

من ماعطانا الله بنجزل عطاياه=من هاجسن مالعثموه الخصومي

متسلحٍ بالصّدق و الصّدق منجاه=لوقلت مهما قلت ماني ظلومي

ياللي تنشّد عن قصيدي ومنحاه=هذا أتجاهي بالقصيد ويمومي

ولاني بمهتمٍّ ولو مـاحـد أوحـاه=لو ان قسمي من اخيار القسومي

ان مادعت حاجه فأنا حاول اخفاه=يبقى بصدري غالين وامـحـشومي

والسّـاحـه مـعـبّاه بالشّعر تعباه=يصدر من اصحاب الهواجيس يومي

كلن يغـنّي طـول حـسّـه اليلاه=وكلن يحاول فيه يرقا الرّجومي

دخـلت لتويتر وقـمـت اتمللاه=به شي مايهظم وشي مهضومي

لقـيت من يتقن لحـونه ومـعـناه=تـعـجـبك كل افكاره اللي يرومي

وهواجسه على الجزايل مضرّاه=وعن الهزال ان عارضنّه يشومي

شعره ولو مايكتب اسمه عرفناه=ختمه تميز عن جميع الختومي

في سـبّ وإلا مـدح وإلا مـعـاناه=معروفةٍ شواهده و الوسومي

ان كان عـانا كنّك اتعـيش بأجواه=يجـعـل بشعره كل قاسي رحومي

وأليا قعديمدح هل الفعل والجـاه=ابيات شعره تستثير العزومي

وأليا هجا سيفٍ يسلط على عداه=ضـربه كمـا الفسقان سيف الفرومي

هـذا ليأوعـد فـي جـديـد انـتـحـرّاه=مـثـل تحـرّينا بيانن حـكومي

ولـقـيـت شـعّـارٍ وكـلّـن وفـحـواه=والكل مـبدع مـانقول مـحـرومي

من ضمنهم من نكّلت فيه دنياه=الحظ ماخللاه ضمن النجومي

ولقـيت بالخـليان من لجّ بغـناه=عرضه كثير ولابه احدن يسومي

يـاكـثـر مـاغـنّـا و لالا مـلالاه=ولحـدن بصـوبه لو يصـايح ويومي

يادبل كبدي من هل الخوض دبلاه=كبدي من اصحاب التّصنّع تزومي

صـحـيـحٍ انّـه فـيـه اوادم مـشـقـاه=وصحيح بعض الهرج ماله لزومي

نـاسٍ تـبـا مـركـز و لاهـي بـويّـاه=ترثع وترثع والمصير محتومي

الثّوم ريـحـه شـيـن لافـاح عـفـناه=عن ريحته لازم نسدّ الخشومي

اسنين ماش ابداع يذكر وشفناه=وإلاّ جهدهم فاسرين الكمومي

كلّن يمهّد قدم الاخـر و ينـخـاه=وكلّن لجل يظهر يطيح ويقومي

لوا عـذابـك يـاتـويـتـر عـذابـاه=ضميت من حورني الشعر كومي

لو ضمّ ماضمّيته انسان يمداه=من مايعاني طش كل الهدومي

واخــتامها عندي على ماذكرناه=مــلاحـضــه يبصـم لها يالبهومي

الشّعر حكمه تنطقه بعض الافواه=ولاهو بمقياس الرجال القرومي

كم واحدٍ تقصر عن الطّيب يمناه=لو كان بلسانه يدربي العلومي

وكم واحدٍ معرض عن الشعر ماجاه=ولايلحقونه بالمواجيب لومي

وسلّم على اللي كلهن وسط مخباه=طيب وقصيد محطمٍ للرّقومي