( صباح الخير )
تنبه ياصغير لاتحسب ان الحياه حلــوم= كلام الناس مايرحم هواك وجرحك الدامي
صباح الخير ياغافل عن الدنيا وصح النوم=زمانك غير اوهـامك وحظك طاح قدامي
تنشدني وانا ماني طبيب ولا خبير سموم=ولاالي في دروب الشعوذه جني ولا حامـي
انا مالي سوى دفتر غرام وصفحتين هموم= قصيد لاكتـبـتـه ياصغـير حرك الهامي
تعلم وافتهم وافهم حياتك والحياه علــوم=احد لاطاح طاح وقام واحد لاطـاح ماقامي
احد يبني حياته بالظلام وياحيـاة البـوم=يهاب النور ويحب الظلام المدمس العامـي
واحد يبني حياته بالنهارولايهاب اليـوم= فهم نفسه صدق حدسه عصامي والهدف سامي
واحد يمشي ولايدري يمينه من يسارالقوم= وقف مذهـول بين الناس لاشرقي ولاشامـي
عيون تنام وعيون سهيره ماتعرف النـوم=ولاهي مشكلـه مادام قـلبـك حي مانـامي
ولامنك لقيت البنت تطغى والرجال رخوم=على الدنيا السلام وزايـله والناس باحلامي
ولامنك لقيت الراي يوخذ من سفاه القـوم=ترفع وجفـهم ياعـل مايـبقى لهم نامي
والى شفت العرب تفزع مع الضالم على المضلوم= تولم للعـقاب وللعـذاب ونـار وازلامـي
والا حدك زمانك وانت لاحاكم ولا محكــوم=يقولون العرب دق الحديـد ومعدنه حامـي
وطيت الداب يوم اني وطيته ماعليـه لــوم=وانا لوهو بكيفي ما وطيت الداب باقدامـي
وقفت بوجه عسرات الليالي والعتب والشوم=وحطت بي مواري بينه لاشـلت هندامـي
ومشيت بسكة الماشيـن لافايز ولامهـزوم= اداير حيـلـتـي يوم وراي ويوم قدامـي
وعرفت ان الحياه الي نعيش ابها سما وغيوم= تقلب بين شر وخير مثل اضغاث الاحلامي
وعرفت ان السعيد الي حياته بين حج وصوم=موحد في صلاته في زكاته مال الايتـامي
والا مني دعيت ونيتي بيضاء كما اليشموم=اقول الله يحييني بخير ويحسن اسلامـي