( جوادي )
الا ياصاحبـي وين انت غـادي= تنافسني على صهوة جوادي
تصد وكن عيـنك يوم جيتـك=لطمها كف من بيض الايادي
تحرى زلـتي وانـا خـويـك=وتضحك لي وفي قلبك دوادي
اعرف الضحكه الصفرا واميـز=اميز بين الابيض و الرمادي
وانا قلبي كما الشاش المعـقـم= فؤادي ماتغير هـو فـؤادي
اجنب عن دروب الحـقد وابعد=عن الغـيبه بصكات النـوادي
واحب الطـيبـين واحترمهـم=سوى كانو حضر والا بوادي
واروم المجد واطمح للبطـوله= واحب الفوز وافخر في بلادي
ووحد خالقي واخـاف ربـي= واجيب الصوت لانادى المنادي
وانا من عرض خلق الله ولابي= ولابي زود عـن جـل العبادي
بشر واصيب واخطي واتـعلم= على قول الجماعه شخص عادي
صديقي ياصديقي وش حصلك= وش اللي جـاك مني يوم تادي
عذارك كلها ماهي وجيهــه= تدربيهـن علي كبر الهـوادي
حسد يمكن حسـد بس المصيبه= باني ذاخـرك عوني وكادي
وانا ماجيتـك اطلب منك حاجه= انا جيتك وفــا ملحي وزادي
وانا اشكر خالقي واللي حصلي=بفضل الله وجـدي واجتهادي
سهرت اللـيل حتى مل جفنـي= سواده ما يجـنب عن سوادي
تغربت وتعبـت ونمت واقـف= وعطاني خالـقي غاية مرادي
فهمت او مافهمت الحل واضح=ولافـيها جـدال ولا تمـادي
دمحـت الزلـه الاولى لانـي= وفيت وذاك واجب باعتـقادي
ودمحت الـثانيه عز وتعفــف=واقول الله ياصبــر المهادي
وهالحينـه فـمان الله واجــب=عسى دربك سفـير ولاتـنادي
فمان الله يالـي كـنـت صاحب=وانا باركب على صهوة جوادي