لاضاق صدرك من عديد اللواهيد=من كثر هوش أقدامهن والجدادي
قم للوضوء واستتبعه بالتشاهيد=واطلب من القيوم عجل المدادي
واستنجده في ركعتين التهاجيد=ترى جليل الملك عجل المفادي
ثم سجّ رجلك مع سهال الجراهيد=لو انّك لحالك بقصد البعادي
بعدك عن اللي يغثيونك هو العيد=لو انت غادي فيه رايك سدادي
الوقت ماهو وقت خيلٍ مع البيد=ولاهوب وقت المهجنه والشدادي
الوقت وقت مصخّرات الأباعيد=اللي مع اللجّات لهن انهدادي
والوقت وقت الذّبذبات المشاريد=عبر محطات الفضاء للمنادي
والوقت وقت الحاسدين الأحاقيد=اللي مع العدوان لهم الودادي
وهم بيننا لجل المصالح أجاويد=حلوين الألسن والقلوب الحقادي
واستغفر الله ما نحبّ التّماجيد=قلنا الكلام ولا لنا به زهادي
مجاراة الشّاعر : فهد عيسى المحمّدي
لا ضاق صدرك بين صِدْرِ ومواريد=وحمول بقعاء ميّلن بالشّدادي
سِجَّ القِدَم ما فيه عيب ومناقيد=ياما حلى رآي الهِدَى والرِّشادي
هيّضني الحالي على شِرَّد الصِّيد=من بعد ما جاني بعلمٍ وكادي
الخايع المِخلي ولا عاكس السَّيد=ومذيع نشراتٍ بوسط الرّوادي
زادت سهوم الوقت الأقشر عباريد=وبار الزَّمن وأصبح رفيقٍ معادي
لا حطّ هاجوسي على فكري القيد=لقيت بالقيفان فكّ القيادي
أتبع هوى وضحىٍ تلتها المفاريد=في خايعٍ يطيب لأمّ القْرادي
وأسوق موّالي وأحوف البغاديد=شقْرٍ لراعَ الكيف غاية مرادي
تطرد عْمَاس الرّاس بأمرٍ وتعميد=ولا حداني صوب الأنذال حادي
أمّا عنوا لي من كرام الأواليد=وإلّا لفى ضيفٍ على الطِّيب بادي
رفقةْ وفاء تطْغَى على الطِّيب وتزيد=من اهل الوفاء ما بين حضر وبوادي