[سعد السمين]

الونــٌه

الونــٌه الـلي تـسكن بـوسط صدري=لا راضـيـه تـطلع ولا راضـيه تـروح
بـأسبابها مـا كنت أبي الناس تدري=أخـاف جـرح الـروح يـثر عـلى روح
وتـقـدير لـلـي يـرتفع فـيه قـدري=الـلي عـلى فـرقاه لـلحين مـجروح
أنــا عـلى صـبره تـصاغرت صـبري=وعرفت معنى العيش والجرح مفتوح
كنت أحسب إن الجرح ينشال جبري= ولقيت منهو قال للجرح مسموح
ماصد عن غالي على حسب خبري =ويقول مالي بقطع الأرحام مصلوح
الآدمي بنهاية الأمر عِبري =ومافيه عِبري غير له يوم ويروح
ونصيحتي حتى وأنا وسط قبري=قطع الوصل لاتذكره لو هو مزوح
لو هو غلط حاول يجي الوضع سري=وأترك كلام اللي يشجع على البوح
البوح بعضه لو غدالك إمضري=وصعبه يجي من بعده الصدر مشروح
والكلمه اللي للرجل ماتذري=لاتقولها لو كان لك صدرن يفوح
جرب على نفسك كلامك وتدري=وش خانته بعيون من يبعد الشوح
كم واحد من كلمته في تعري =عِقب الستر من كلمته صار مفضوح
الكلمه الشينه مع الناس تسري=وتحسب على من قالها وين مايروح
ماكان له داعي بها الناس تدري=وتبقى تَردد بين صاحي ومشفوح
الرأي زين وخل عنك التطري=بالراي والشورى يجي الشيء مملوح
شارك برأيك واطرحه لاتصري=من عرض ماشفته من الرأي مطروح
وإن شفت بالموضوع بعض التزري = مالك وماله مايبي منك منصوح
لاتطاوعه بالرأي تراه يَضرى=وليا ضَرى راي العقل صار ممسوح
وإذهن كبير القوم لايصير كبري=عنده صواب الرأي واضح ومشروح
لو كان شفته من عنا الوقت مبري=التجربه عنده وفي عينه تلوح
عنده دواء وعلاج للجرح يبري=وماينقزه بالرأي عاقل وطحطوح
لعل قبره عن هواء النار مذري=وفي جنة الفردوس تبناء له صروح

سعد تركي السمين

اصايل معجب بهذا