( طير السّعد )
ياطير ياطير السـعد يابيض الجـاه =اشلــع بجنحان السعد لاتومي
ازبن على ضــلع طويل تنصـاه= كم صار لك ياصاحبي فوق كمي
سيل المعاني جاك عاني من اقصاه=وسحب القوافي امطرت فوق جمي
تزاحمت خواطــره في شغايـاه= تنحت ضلوعـي لين بيحت همـي
تسمع هديـره يوم يضرب حناياه =مثل الـرعـد في برزخ مدلهمـي
تروي عــروق يابسات ثنـاياه= من عـقب ماهو وادي صار يمـي
خلك على راس الجـبل لاتعـداه =ولافـاض يمي رد ياطـير يمـي
واعطيك نبذه عن طـريق مشيناه=زميت نفسي فيه ياطير زمي
مشيت درب غير الوقت ممشـاه =درب تحـداني وانا قـلت تمي
مشـيت فيه وجاهل في خـفاياه=من هول مافي سكته فـار دمي
لقـيت ذيب بالخلا تطرده شـاه= عقب الطنيب امست حناياه صمي
لقيت حر والحبـاري تــولاه = تهوي عليه ومخلبه مايدمي
ولقيت شيخ حافيات مطاياه= يضم صدره للمشاريه ضمي
ولقيت عشاق الفخر والمحاباه=كل على جثت خويه يسمي
ودخلت بيت غير الناس مبناه=بيت يشيب صاحي الفكر غمي
بيت كبير ومظلمات زواياه= ناسه تساقى من عمى العين سمي
ورجعت سالم غانم الحمد لله= والحمد له ثاني وثالث وتمي
الي نبي مع عزة النفس جبناه= وحطيتها هي تاج راسي معمي
ياطير دولاب الدهر لاتحداه= يلف بك لف الرحى يوم رمي
خلك على راس الجبل لاتعداه =واسمع كلامي وافهمه لاتومي