[اللحالي]

(رحلةٍ باجازة العام الدراسي)
الصداع اليا اختلط مع العـمـاسي
ما تفيدك لـو جـذيـت الـشـاذلـيـه

الصدور الـواسـعـه قـبـر الـمـآسي
يضحكون في ضمايـرهـم لـظـيه

ودي اني في حياتي دبلـومـاسي
اتـعـامـل بـاحـتـراف و عـبـقـريـه

لكن اني نوب من شدة حمـاسي
صار لي عـند اقربـايـه مـكـرهـيه

يارفـيقي و الله انك فـوق راسي
لا نصحتـك سـر مـامـني خـطـيه

لوحصل لك ماحصل طارالنعاسي
مـا غـدا لـلـنـوم عـنـدي قـابـلـيـه

لا لمس قلب الجهاز الالـتـمـاسي
ما يفيد. مهنـدسـيـن الـعـالـمـيـه

الصداقه لا حصل فيها اللتباسي
هي صداقه صدق والا مسرحيه

لاغدا حبل اللوازم بامـتـسـاسي
تقل اشاعه في تخصص باطنيه

الاطـبـاء دوبـهـا تـفـر الـكـراسي
المريض يشوف منهم عاطـفـيه

طمأنوه و قولهم. لاجـاك بـأسي
و اخدموه بروحة لـلـصـيـدلـيـه

في جناحٍ هاديٍ مابه حـسـاسي
غير صوت الاجهزه و مرافـقـيه

الكلام الصـدق بين و الـهـلاسي
و النوايا تنكشف لو هي خـفـيه

الاوادم نهجهم مـاهـو سـواسي
شر خلقه من يثير الـعـنـصـريـه

الجدار اللي يقوم بدون ساسي
هج عن ظله ولـو لـلـصـنـقـريـه

من هموم اليوم لابس لي مقاسي
و يشكرون الصابرين العاقـبـيـه

اتسلى بـالـتـفـسـح و الـتـنـاسي
دون اسافـر لـلـديـار الاجـنـبـيـه

روضةٍ ماللـغـنـم فـيـهـا مـداسي
فوقها دوم الـمـزون الـعـقـربـيـه

عشبها رويان ما جاه الـيـبـاسي
والخـبـاري واجـده في كل نـيـه

الدداسن ما تصلهـا و الـتـكاسي
غر جيب ما يـعـرف الـبـنـشـريه

مايبنشر لو وطا فوق الـمـراسي
والسوايل مانقص منهـا الـبـلـيـه

جيب شاصٍ كل شي فيه اساسي
لامكانـيـكي ولا جـاء سـمـكـريـه

مانشد عن الغراز و لا الخفـاسي
واير البكره يجي له حـول مـيـه

للظروف القاسيه راعـيه حـاسي
والقدر مومن به و نفسه رضـيـه

القدر من فوق تفكير الـسـيـاسي
و قـوة الايـمـان عـز و مـعـنـويـه

لو يبي عداه في روس الرواسي
سايقه مطنوخ و عـزومـه قـويـه

في دمـاثٍ مـابـهـا مـكان قـاسي
طول ماحـنـا بـهـا و الـنـار حـيـه

الدلال يـمـسـهـا مـنـهـا مـسـاسي
ومن يبي يطبخ ويشوي له شويه

الذبيحه باقـيـه مـلـي الـتـبـاسي
اجذعه في سنـهـا مـاهـي ثـنـيـه

مانت قايل ياولدوش انت ناسي
كل حاجه حطهـا في مـطـبـقـيـه

رحـلـةٍ بـاجـازة الـعـام الـدراسـي
اتـنـهـت..كـل. مـا تـطـري عـلـيـه

الشاعر مهيد عوض الحربي