[اللحالي]

يابو فهد من عام تسعه و تسـعـيـن
بـيـنـي و بـيـن الشعر حد وحرايب

و تـقـول سـمعني من الشعر بيتين؟
تحكي عن الماضي وبعض الغرايب

ماهي غريبه لو كـتـبـت الـدواويـن
و بـعـثـرتـهـا مـع عـاتيات الهـبايب

مـيـر* الـعـوايـد و آحترام القوانين
تمنعني ارجع له عقب صرت شايب

وارجـع لوقتٍ حال مندونه إسنيـن
و أيـام راحـت بـالـفرح والمصايب

بـكـيـت فـيـهـا فقد ناسٍ عـزيزيـن
وضحكت فيها في اجتماع الحبايب**

وعانيت فيها هجر وافراق غالـيـن
و جرحاً مع الايام مـاهـوبـطـايـب

راحت سنين العمر بألزين وألشـين
اقـفـت و حـنـا مـنكفين الركـايـب

هاذي هي الدنـيا مـتاعٍ الى حـيـن
و ارواحـنـا يـم الـمـنـايـا جـلايـب

يـالله يـاقـابـل صـلاة الـمـصـلـيـن
يالواحد المعبود منشِ السحـايـب

ياغافر الـزلات يـاقـاضـي* الـديـن
تغفر ذنوب اللي لجأ فـيـك تـايـب


ابو رامي