[اللحالي]

جيب القلم واكتب على سطور قرطاس
مـثايـــل زينـــات لوهـــي قـلـيــله

يلقى بها اللي ينشد الطيب نوماس
واللي كواه الوقـت يبــــري غليلـه

ياحيـــف يا وقتٍ به الحر ينداس
واللاّش يصبح شيخ وسط القبيله

اللاش يحجز له مع الناس مجلاس
مـــن بعـد ماهو جــالسٍ بالنثيـلـه

حـطوا على راسه دنانيــر والمـاس
واليا تكلم قـــام ........ ايعويــلـه

من أول مـعـروف خـايب وبـــلاس
يجلس على الديران محـدٍ يشـيلـه

واليوم صار اتقول عنتر وجـسـاس
يمـشي بوسط الناس ولحدٍ مـثيلـه

يقولها اللي حاسه الوقت وانحـاس
واصـبح ابـها الدنيــا امـضيع دليلـه

اللي كـواه الوقٌـت بالـهــم والـياس
واللي يـشـوفٌـه قـــال واعــزّتيـــله

لاباس ياقـلـبي مــن الوقـت لاباس
لاباس وابشكي على مــن شـكيـلـه

اشكي على اللي خوته ترفع الـراس
حسين ابن هـنـدي برز بين جـيــله

على عليهم وارتفع طـيب الـسـاس
للطـيب والنــومـاس كلن يجـيـــله

معروف بالحكمه وتشـهدلي الناس
قــوله حكيــم ولايجيب الهــزيـلـه

ياحسين انا محتار والفكر محتاس
واصبحت كني فــوق نـار ومـلـيـله

من سبّة الدنيا وناسٍ بهـا انـجـاس
فيهم خسيس ولايجي دون حـيله

ازريت اميز صابني منهـم اعـمـاس
ناسٍ خـسيسه بالثياب الجـمـيــله

لاشفت واحدهم تـقـول إنه ادباس
اللي يصــــوم وقايــمٍ طـول ليـله

له مـلةٍ تــجـهــل نبي الله الـيــاس
يقولـهــا نــاصر وانا اقـول قيـــلـه

استثني اللّي دينهم دون وسـواس
اهل التقى واهل الخصال الفضيله

اللّي لهــم في كل قومه ومجلاس
اصلاح بين البين وطرد الـرذيـــله

ماذمّهم تزرى على قـولـي النــاس
من ذمهم يلقى الخزي والفـشـيلـه

وصـلاة ربي عـد ما نـس نسـنــاس
علـى رسـولٍ خـص بـأفضل وسيله

عبدالله معيبد السليمي

رد الشاعر / حسين عبيدالله بن هندي
على الشاعر/ عبدالله بن معيبد السليمي
بهذه القصيدة .

هات القلم واكتب على الطرس بقياس
زجـــل القوافــي مـــن زميل الزميلـه

فـريــت دولاب الضمايـر والاحساس
ونقيت صــاف القيــل واترك حثيلـه

يا مرحبــا باللي شـكا لي هـوجــاس
وعزاه يا مــن حس بــالوقت ميــلـه

يا بـو يزيــد الله يجيرك مــن الباس
والهـــم والهـوجــاس ربـي يـزيــلـه

يا القـرم يـاللي سيرتك خير نبراس
يــالنــادر اللي مــاكـره بــالطويــلـه

يا بــن مـعيبد يـوم دقيت الاجراس
النـــار عنــدي ولعــت بــالفتـــيـلـه

الوقـت هــذا فـيــه صـادق وهـلاس
سكر نبـــات وخــالطه حـنـظـليــلـه

أشوف ناس اهدوس بالعيب غطاس
مــن خلقتــه مــاحاش علم النفيلـه

ابـو حـقـــب يــاكر مواكير قرنــاس
والليـــث تلقى فـي عـرينـه بـديـلـه

جندٍ على الأجواد يكضع بالاضـراس
وعلى الرجــال الطيبــه شـن خيــله

وقت السعه خيال من فوق الافراس
وان صمَّـلت يهــاب سـرج الكحـيلـه

وعـند الربايع لابس الدرع والـطـاس
ويصــد جيـش الروم عنــد الحليلـه

وبـــاللازمـــه تلقى علومــه تـمـلاس
مــع الخريــش إيــفر يجفـل جفيله

هوبج ثغب بالوصـف مـثله وينقـاس
لو كان جنسه يختــلف بــالفـصيـلـه

مـثــله فـي الـثيَّل له ارباط واركاس
يربــط على كداد وســط الخـميــله

راع النـــقيــلي بــالقفـا سـم نـداس
اللّي مـــاهو فـي سكّتــه يلتـويــلـه

هــذاك منبـــوذٍ وللـشــر مـقـبـــاس
واليــا نـخــاه ابــليـس يرفـع شليله

والعاقل اللي مـايجـي درب لـولاس
واللي قـطــع للسيـد مــا يرتخـيــله

حِـد الردي لصــار للحـبــل مـسـاس
خله عن الاجـــواد يـــعلن رحـيــلـه

والدين يمـنع صاحـبه درب الادناس
والنـــاس بيِّــن سَـجْعَـهــا واتْهَـليلـه

والعُوج لوهي واضحه مثل الاقواس
لصــار مــا تـعنيــك خٌـل إتْـعَـديــله

لا صار ما تنصــاك فـي كل مـقـياس
عن سيـل واد اخليص جنّب مسـيله

وصـلاة ربـي عـد زفـرات الانـفــاس
عـلى نبـيٍ مـنـهـــجـــه نـنـتـمـيــلـه

حسين عبيدالله بن هندي