[اللحالي]

‏‎قصيدة من الشاعر عقيل غزاي ابن نافل السليمي رحمه الله والرد عليها

يازين جـو اليـــوم يا حسين زيناه
‏‎مد النظر يا حسين والجـو صـافي

شفت السما ترسل على القاع حسناه
والقاع تجحد ما بـهــا من جـفـافي

مد النظر من راس عيطاً مـسـمـاه
يطفي لهيبٍ ما تجـيـه الـمـطــافي

بالهضبـه اللي بالـحـلايـا مـحـــلّاه
وبالاسم سـمـيـة جـواد الـسنــافي

اللي ابن ضبيان من راس شـلـفـاه
عاف الحياه وحِب حـم الـشـعـافي

يا زين راس الرجم يومـني ارقـاه
لو عـاد لـي ذكـر اللـيال الـمـقـــافي

قفن بـحـيٍ كـل مـا حــل طـريـــاه
يصيبني عـن هـالـزمـان انـحــرافي

أعـيــف لـذاتــه تحـسـب الـبــلـواه
الخـيـر مـامن خـير والشر ضــافـي

ياحسين كلٍ لـه مـع الوقـت ذكـراه
كلن بكى مـا ضـيــه بـيـن وخـافـي

ما فــات مـن دورٍ عـلينــا بكـيـنــاه
حيث ان وقت اليوم فـيه اختلافي

أول قصير البيت ليا حـل طـريـاه
النعم ما بـيـن الـقـصـيـريــن وافـي

واليوم قصير البيت بس انتـلافـاه
الخـير ما من خـير لـيت الكـفـافـي

هــذا زمـــانٍ نـــاقـلٍ داه.. بـــرداه
اسمع واشوف ولا على الله خـافي

الحكم حكّم والقـضـايا مـقـاضــاه
دام القضـاه يشـاورون الـضـعـافي

الذيب يسعى ما حصـله مـسـاواه
يركض وريـقـه ما تـبـل الاشـافـي

اشـوف حـيٍ ما تدرهـم مـطـايــاه
وركب الركاب اللي على الرجل حافي

وهداج أشوف الورد قامت تـعـداه
من زود جور المعضلات العجـافي

المستحي قامت تحده على اقصاه
وتضحك لجمهورٍ يـدف الـدفـافـي

العفو ما كل الخــلايــق مـعــافــاه
واقــول مــا كل اللـيــالي عـوافـي

لانـي موضحـهـا ولاهـي مـناجــاه
ولاني بحال أهل الحمول الخفافي

الحمل وين اللي من الناس يلقاه
عن الضعوف مجـودين الكتـافـي

عقب اللئيم اللي بلاهـــم ابــلـواه
العلم وضحته وانا شاب قــافــي

تــم الكــلام اللي كتبــته بمعنــاه
وانــا موقــع غلطتـي بعتــرافــي

وصــلاة ربـي عـد مزنٍ نثـر مــاه
على النبي الهـاشـمي بــالطـوافـي

‏‎عقيل بن غزاي بن حجر السليمي

‏‎الرد على قصيدة الشاعر: عقيل بن غزاي

‏‎بديت باللي تسجـد الناس لـرضـاه
عــلام مــا كنه ضميــر الخــوافـي

رب الملأ اللي تدعي الخلق باسماه
خوف ورجا تدعيه ويـمــد وافــي

مــن بـعـد ذكر الله البـوك جـبـنــاه
فوقــه مداد ايـراع يرعف رعــافي

وفريت دولاب الضماير من ارجـاه
ودعا الهجوس وحضّرن له مـلافي

هيضٍ مــن اجزال القوافي منـقـاه
نقوة عقيدٍ حــازهـــن بالـمـحـافي

عفرٍ مع المصلاح في راس مفـلاه
واقـفـا بهـن وهـو فـي النوم غـافي

لعقــيــل الـغــــزاي ردٍ كـتـبـنـــــاه
زجل القوافي والبيوت الـنـظـافي

عقيـــل زهمـني والــمـرد يتـحـراه
يالله عسى المردود كافي وشـافي

جاء بوتدات وعـالي الـرجـم عـداه
وغنى وهيجن فيه قـبــل النكافي

واعْجب بجوّن فيه ويهيجن غـنـاه
وغنى القوافي مثل صقر النصافي

وقطف من الازهار من كل مـرعــاه
وشـيب في الطاروق كل القـوافــي

وقـالوا وقلـنـا راقـي الرجــم عـنـاه
ويحس له باقصى الظماير شغافي

يا بو فهـد الـرجــم هــذي سـوايـاه
ينبيك باطلال عـليـهـا الـســوافــي

وحي سكن حوله ومـفـلى رعايــاه
واثـار نـاس سـامـده مــا تـشـافــي

باجداثهـــم ما يسمـعـون الـمـنـاداه
رهـن العمـل في ريبة وارتـجـافــي

وكـل يـبـي زمــانـــه أول ويـرثــاه
ويبكي على دور مـضـالـه وطــافي

وتشكي زمـانٍ خـالـطٍ داه بــددواه
وتقول يا وقـت الشـقـاء بـس كافي

هـذا زمــان الـعـولـمــه والـمـعـانـاه
لصالح ناس وناس مجحف اجحافي

ونبـينا بالـجــار جـبــريـــل وصـــاه
ما يصيــر حـقـه بين الاجواد هافي

واجــد رجــالٍ واجبـه مـا تـنـاسـاه
شيمـة عرب في واجب الجار تافي

وتـغيّـر الايــام والـوقـت شــفـنــاه
نوبٍ عدال ونوب فيه إنـعـطـافــي

مــن كثر مـاله قـالوا الناس حـيــاه
مـن شان دنيا لـلـفـنــا والـتــلافــي

ويقـام له تقديـر ويـحـــط مـركــاه
كنه من اللي يحتمـون الـعـطـافــي

ومــن قـل مــاله يتركونـه دنـايــاه
باروا بــه الخلان يعـطـــون قـافي

وأبـو حـقب في ماكر الحر تـلـقــاه
وأبو زئير من المـقـوقي يخـافــي

والرجل يبلش في قـريبه وعوجاه
والنصح والإرشاد يـبـغى مـلافــي

واللي يسب فـلان وفلان يـشـنــاه
فمه عن الـنـمـات مـاهــوب دافــي

كم واحدٍ يبغى السـلامـه ويـبـــلاه
تـاجـر غـثيث الهرج خطو الهـلافي

طاوع قرينه بالخطأ والله أعـمــاه
وحصل جزاه وجاه فوقه أضـافـي

ومن تابـع الغلطـات يزهـد بدنـيـاه
ومن لا صبر يجيه بعض الحسافي

وكل بعرفـه في مسيره وممـشــاه
الله يجـنبنــا طــريــق الـمـهــافــي

هـذا الذي كـتـبت واشـــوف واراه
ولا كــل رمَّــايٍ يصـيـب الهــدافي

وصلوا على اللي بلغ الدين وارساه
نبـيـنــا اللـي مــا لـديـنــه مـنـافــي

‏‎ حسين عبيدالله بن هندي السليمي