[اللحالي]

قصيدة للشاعر: مقحم محمد الديري
ويليها مجاراة من الشاعر: حسين عبيدالله بن هندي السليمي

انا لي خمـس سـنين تعـبان ياسلمان
ماعرف اهرج لكن عسى الله يشفيني

عـلى مـامضى لي يابعيد النظر ولهان
ايام الصـبا يـــوم الهــواء له مياديني

يازين السنين الأوله ولا انا غـلـطـــان
يوم إن النشـامــا للوفــاء مـستعديني

والأصحاب واجـد مير تجاهـلو ماكان
نسـو رفقتي مافيهـم اللي يحـــاكيني

بعدماتعبت وصرت ماني فصيح لسان
اشـوف الجـفـا بعيون بعض المواليني

ولاني على ماصـار لي وحـصل ندمان
عـرفـت الرفيق الوافي اللي مصافيني

طـويل الذراع مـعرب الأصل والجدان
ولد فـيه خير وبالقسـاء مــايـخــليني

حـسـين عبيدالله رفقته للوفاء عنوان
من أهـل المليحـاء ملحقين المخليني

ليا زدت زاد وشـرع البـاب والـديـوان
هـذي سـيرته دايم على العسر والليني

خلان السعه عند اللوازم ماهم صدقان
من ابعـد جميع الناس ولا من الادنيني

يقـولون رح سير على فـلان والا فـلان
وانا عـــارف إن فـلان وفــلان مقفيني

ترى الصـدق نور وفـيه للمجتمع برهان
مـا قـلنا خـطـأ يالـصــايمين المصليني

ترى الشـعر فن وذوق والموهبه ميزان
اسـأل الله الوهـاب وارفـــع له يدينـي

اسـأل الله المتعـال ربي عظيـم الشان
اسـأله بكل اسـمـاه من قلب يشفيـــني

وجيت الطبيب وقلت انا من سنه وجعان
وفكر وشخص حالتي وابتــلش فيــني

وصرف لي حبوب مصنعه مير انا مرضان
عـليـــل اتــردد بــيـن كل الـمــداويـــنـي

وجـسـمـي نحل وانحل حالي وانا تعبان
ولابـــاقــي إلا الـدم داخـــل شـراييـــني

وجـيـت الحـكيم الراقي العالم الفـهـمـان
لـكـن جـنن الصـاحـين قبل المجـــانيني

أسـال الله التوفيق والخـيــر والرضــوان
عـسى الله يغـفـر لي ذنـــوبي وينجيــني

لـقـيـت العـلاج الشـافي الكافي القــــرآن
كـلام الله الـرحمــــان وحــده يكـفـيـــني

الشاعر / مقحم محمد الديري


الرد من حسين عبيد الله السليمي

بســـم الاله اللي فـرض خـمـسة الاركان
إلـهٍ سـجـدنا لـه ولامـره مـطـيــعيـــني

وعلى هدي مبعوث الولي خاتم الاديان
نـبـيٍ نـصــوحٍ بـيـَّن الحــق..تـبـيـيـنـي

ومن بعد ذكر الله نقيت اطيب القـيفـان
وانا كيف ما انقى القاف والرب معطيني

وترى الشـعـر في معناه بالقاف والاوزان
شـعـور شــاعـر تـرجـمــه لـلـفـهـيـمـيـني

وبالـشـعـر يامقحم لي الدور بعدك حـان
بـرد الـثنـاء جـيتـك مـن العـيــن للعيـني

على قاف يحـمل لك شكر مني وعرفان
على مدحـك اللي بواجبي يــوم يمـليني

ولاهـنت ياراع الوفاء مقحــم كحيـــلان
شـهـم وكريــم ومــن رجـالٍ كـريمـيــني

ولك عـزوةٍ تـقــدر الـضـيــف والجيــران
سـيوف صـقـيله فـي وجيه المعــاديـني

انا يالـوفي قـدرك على خاطـري مـاهـان
عـليـك المـرض لوزاد مــاهـو مـنسّيــني

ولك بالوفاء والطيب شـانٍ بلا نـقـصـان
ولافـيه شي يحـول مــن بينــك وبيــني

وانا عارف انك مانت بالله ضعيف ايمان
صـابـر و مـتـوكـل وفـاهـم فـي الدينـي

و الـوقـت يـعـطـينـا عـن المـجتمع تبيان
بـعـد الـتـفـكـر تـعـرف الناس مـن ويــني

وقـتٍ مـضـى وهـالحين من بينهن شتان
وكـلٍ رثـا مـاضـيــه مـع. نـاس وافـيـنـي

ولا تـصـفـي الدنيا سليمـه بـدون احـزان
عـلـيـنــا تـشـيـن ايــام و ايـامن اتـزينـي

بوقت السـعـه تشـوف واجـد من الخلان
ومـن يـصـفـي بوقـت الشـدايـد قليليني

و انـتـه حـكيـم وتـحـتـمـل كنك ابليهـان
وبـالـقـدر عـالي مـانت ناقـص مـوازينـي

مـاتـبـدي الـشـرهـه عـلى صـدة الـرديـان
مـشـاريــه مـثلك للـرجـال الـمـيـامـيـني

عـسـى مـاحـصل طهور واجرٍمن الرحمن
هـو الشـافي اللي كون الناس من طـيني

نبي نطلب الله يشفي الصاحب السقمان
مـقـحـم عـسى المعبـود يشفيه ويعينـي

إلـهٍ لـه. الـتـدبــيــر و مـســيـّر. الانـسـان
جـــلا جــلالـه كـوّن... الكـون. تـكـويـنـي

و صـلاة... ربـّي..عــدّ مـا هــل مـن ودان
عـلـى نـبـي مـنــهــجـه.. فـيـه راضـيـنـي

حسين عبيدالله بن هندي السليمي