[اللحالي]

قصيدة لوالدي الشاعر
عبيدالله بن محمد ابن هندي رحمه الله
ويليها الرد من حسين بن عبيدالله

يــا راكب.. اللي طـالعٍ عقب تـمريــن
أشهب.. مـن لون الأرض هـذاك لونـه

يــعـلم. على الميـه فـوق الثمـانــين
يبي يـطيــر وبــالقــدم يــمنــعونـــه

يمشي على القاسي ويمشي على اللين
همــلول. صيـــفٍ والبــرد بـه نمونــه

منــوة سـجـينٍ غــايـبٍ لّه زمــانــين
فيــه الحديــد وصكوا البــاب دونــه

نبي لنــا تــفـريـجـــةٍ بــالحــرميــــن
وسبعــة أشــواط نـعدهـن في ركونـه

ركابـتـــه خمسـه وسـواقــــه حسـين
والروض اخضــر والكمــا يجمعونـــه

واحــد جلس قـاضي والخصم لثنـين
واللي فصــل بــالحق مــاله مهــونــه

عيني. شكت قـلبي وقلبي شكا العــين
و العيـــن عيــا يمسك الدمــع نــونــه

دنـــا الرحيــل و عـدّة العمــر سبــعين
حــت. الورق والعــود يبسـت غصونـه

لابــد له مــن يــومٍ يقضى بــه الديــن
ويــعــلّق الميــزان تحســب اديــونــه

وخشمه على الجال وظهره على الطين
لو هــو وزيــن الروح مـا يــرحـمـونــه

هـلوا.. عليــه.. التـرْب شـمـال ويـميـن
لا يجيبهـم.. بــالصوت و لا يـكالمـونـه!

عبيدالله بن محمد بن هندي

رد الشاعر / حسين بن عبيدالله
على والده بهذه القصيدة

ياراكب اللي جـاهـز وفـــل بنــزيـــن
جمسٍــ. جديــد ومصنـعـه يضمنونـه

آخـر مـديــل السوبر الزيــن لونــين
مثــله لحــزات السـفــر يـشـتـرونــه

دليلتــه يركب عــن السايـــق ايمين
أبــو حســين بــدربـهــــم يسألونــه

فـي وقتـه المـاضي خبيـرٍ وذالحيـن
تجاربـه تضـفي على الصعب هونــه

توجهوا من ركبوا الجمــس مــاشين
يـــم الذي بـقلوبــهـــــم يـرغبـونــه

بـعــد..المديــنه يــم مكــه ملبيــن
طــافـوا وآخـر نسكهـــم يَـحْلقونـه

ومشواإلى الطائف ولاهم بعجلين
مــع الهـدا طــريقهــم. يَعْرِفــونــه

حيث الشفا ممطور والجو بــه زين
واللي تبي انـفوسـهـــم يطلبــونــه

اسبــوع و قــالوا للسّفر مستعدين
نجــدٍ بــهـا ذكر المطر يسمعونــه

ومشوا على الصمان ماهم سريعين
حيث الزبيدي عنــدهــم يلقطونـه

و شبـه الجزيره ربعت كالبسـاتـين
نــاقــع مطرهــا ويـتـراكـم مزونــه

و ساعة فرح عندي تساوي ملايين
ورزقي على اللي معْتلي فـوق كَونه

و الآدمي.. منشاه مـن لازب الطين
و آخر مصِيــره بـالثـرى يـدفنـونـه

يــا منــزلٍ طـــه وعـــم ويــاسـين
يــاللي عبــاده كلـهـــم يـرتجـونــه

تـجعــل لنــا منــزال عنــد النبيّين
فــي جنــةٍ وعـدتـهــم يــدخلونــه

وصلوا على اللي بلَّغ الناس بالدين
محمـــد اللي بــالنــداء يــرفعونــه

حسين عبيدالله بن هندي