[ترانيم حربيه]

طاح العتب مــاهي حكاية مشاريه

خــل الكــلام وحبل الأعــذار طـوه

مـاراح أقــول اشلــون او كيــف ليه

تــرى السؤال بدون اجــابه مشوه

العذر ماات ومات همـــــــه وراعيه

والجــرح جــف وجــف غيمــه ونـوه

صاحبك ضاع الهرج من بين اشافيه

مــاكنه اللي كــان قبلك مفــــــوه

يجمــع لك من الشعر فــاخر معانيه

ويــمــوت عــندك قبل فيــه يتفــوه

ليــه انصــدم وتخـون قلبي هقاويه

ويــطيح نجمــي وأنــخذل في علوه

لا يــابعدهــم واول الـغيث تالـــــيه

وأنــت تعـــرف قــلبي وخيره . وسوه

يمــكن لو إنك قلت غلطان قلت اييه

ميــر البلا إنك قــلت نـــاقص مــروة

الله يبيحك عن خطاك وتمـــــــــاديه

ويــبيح قـــلبك عن خطـــاه وغلـــوة

مــادام حبك خــالطه شك مابيــــــه

حب الــعتب والشك .مــاعيش جـوه

يامـــرحبا بالجــرح والله يحـــــــــــييه

لا صــار مــن يــمــناك والجــرح تــوه

بــعض الجروح ان صابت القلب تنهيه

وبــعض الجـــروح تــزود الــقلب قـوة

الله كتب والقوس في كف باريــــــــه

واللي تشوفــه يــابيض الــوجه سوه