يالله إني رجيتك لا تخيّب رجاي=يا مُجيب الدعاء يا سامع اللي دعاك
طالبَك تغفر ذنوبي وتدمح خطاي=أنت ربي وأنا عبدك ولا لي سواك
بين أصابعْك قلبي وأنت تعلم خفاي=إني أخاف ما يغضبك واتبع رضاك
اهد قلبي على دينك وخفّف عناي=يا غنيٍّ عن مطيعك وعن من عصاك
يالله إنك على دينك تثبـّت خُطاي=يا مدير الكواكب كلّها في سماك
الخطايا كثيره والمعاصي وراي=ولا أحْد يحميني إلا أنته ولذت بحِماك
طالبَك يا إلهي رحمتك هي مُناي=واهني من حظى في رحمتَك وبلِقاك
آه من وقتي اللي راح هذا بلاي=ارتجف لا ذكرته خايفٍ من جزاك
الجهل تهت به وقتٍ مضى من عماي=يوم ما كنت أفرِّق بين هذا وذاك
ما اعْرف إطلاب صدقاني وضحكة إعداي=من ضحَك لي بـسنّه قلت كِلّش فداك
إضحكوبي وأنا أحْسب ضحكهم من غلاي=دهوروني وعفت العرف والاحتكاك
يستغلون طيبي طمعةً في عطاي=وأثْره يبيـعك اللي لجل لقمة شراك
يوم يلقون عندي شيء هُم أصدقاي=ويوم شحّ الزمن واحتجت قالوا وراك
واتّضح كل ما كنت أجهل بمبتداي=التجارب مفيدة لا اعتبرت بخطاك
وشفت كل الوجيه اللي حكَت في قفاي=من حكى عندك بغيرك حكى في قفاك
ضاع مستقبلي كلّه وأنا أتبع هواي=ولا دريت بضياعي لين ذقـت الهلاك
الشاعر/ عوض بن عواض الغيداني