بسم الله الرحمن الرحيم
السلام عليكم ورحمة الله وبركاته
مشاركتي بزواج//عيسى سليمان الشميلاني
صدفه غريبه ذكرتني مامضى من ذكريات=في ساعة نادو بها والخيل من خيالها
وانا خيولي دايماً وقت اللوازم مسرجات=وان جات عقده بالزمان يحلها حلالها
وقت العزاوي والرمك وقت الحمول الكايدات =ماللحمول الكايدات اللا ضهور جمالها
ماني بحيا الله ورق تذري عليه الذاريات=تلعب بها هوج الرياح وينتهي موالها
والصدفه اللي روحت وجمال اهلها ساريات=مانزلت قدري وخلق الله على منزالها
بس الغريبه روحت بين الصحاوه والسبات=والوقت هذي حالته والناس هذا حالها
والليله بروق الحيا وسط المزون المرزمات=قامت تلوح بروقها والخير وسط خيالها
وان لاح براق الحيا والناس في حالة سكات=قامت توارد شردٍ بالفكر مايبغالها
الا حكيمٍ يبدع الابيات ويلم الشتات=ويقول ياعيسى ضيوفك عامرٍ منزالها
يامرحبا ترحيبةٍ من خاطري سكر نبات=ترقى سنود وتعتلي ماينثني معدالها
ترحيبةٍ بالوزن ترجح بالجبال الراسيات=واعيدها وازيدها ضعفين وزن اجبالها
يامرحبا باهل الوفى والطيب بالعلم الثبات=اعداد ماشفنا المخايل هلت بهمالها
لكن ياعيسى تبيها بجد والا مجاملات=الجد هذي ساعته جمله وناصر قالها
ابوك قبلك له مكانه والدلايل ثابتات=هذي علوم الصدق بين دقاقها وجلالها
بيني وبينه خوةٍ وقت السنين الماضيات=خوه على وضح النقا حتى كسبنا جزالها
له منزله عندى تعدا للنجوم العاليات=والنظره اللي بعدها مترين فال الله ولافالها
بعض الهروج العوج ماتحسب ولو راحت وجات =على مقام اصحابها ماني وكيل اعمالها
وانته ياعيسى لو مدحتك للمديح مبررات=تمشي بدرب ابوك والعليا لك وترقالها
مافيك ذارب فارسٍ راعي سيوفٍ مرهفات=وانته من ابطال المعارك لاحسبت ابطالها
واذا بغيت ملاحظه عندي عليك ملاحظات=المرجله والطيب والنخوه بكل احوالها
والصدق وعلوم الوفا والاولات الاولات=وصدق المبادي والكرم ياعمها ياخالها
وناسبت لك قرمٍ عريب جدود راعي طايلات=رجل سعى للطايله بالجهد حتى نالها
يعيش ابو تركي عريب الساس معروف الصفات=والمرجله دايم نصيب اللي يجي يسعالها
وكل القبايل والنعم على السلوم الثابتات=وكلٍ عن الهزلات تكرم لحيته وسبالها
=الشاعر ناصر الشميلاني