ناسٍ مع الصيد مهتويه وشقيانه=ولْعه من الله وطرد الصيد ولعتها
وناسٍ مع الحرب مهمومه وبلشانه=ثارت مع الحزم والأخبار شاشتها
وناسٍ مع الكورة تغنّي وطربانه=وبطولة الكاس والدوري بطولتها
وناسٍ مع المال مبليّه وشفقانه= مشقيهم الله ورا الدنيا وزينتها
وناسٍ على ويش مدري ليه زعلانه= مع كل ريعٍ تعالى صوت لجّتها
وناسٍ وناسٍ وخانه بعدها خانه= تُملا بالأحداث حسنتها وسيّتها
سبحان من قسم الأرزاق سبحانه= يوم آتفكر واشوف الناس وش جتها
ماني بـ أذمّ الأوادم كلن وشانه= ينجيني الله من عباده وغِيبتها
أنا بعد مثلهم لي ناس وبطانه= ولدري على أيّة مدى ترسي نهايتها
لكنّ دنيا البشر ترفه وفتّانه=لو جاز لي وصفها ماجيز فعلتها
والطيب يُذكر وكلْ رجلٍ وصدقانه=تبان يمنى الكريم بجزل مدّتها
وقوام دنيا الفنا بالدين وأركانه=اليا اعتدل دينك الدنيا بقلعتها