يابنت ياللي ما سِتر راسك الشال =
وبزعمك أنك من كبــار العـــوايل
أنا بقــول الحق والحــق ينقــال=
اللي تســتَّرهي بـنـت الحـمـــايل
ماهو في كشخه وخاتم وسلسال=
السترلعـيــال الحمـــايل دلايل
يابنت لوقلتي لي المهـر بريال=
والله فـلا أعنز عليـك السـلايل
والله لأخطب اللي على راسها جلال=
لوكـان مطلبها ثمــانين حايل
أنا ليـا مني خـطبت أبغى عيال=
أبي العيال اللي تشيل الثقايل
وليا خطبت أختـار لعيالي الخال=
والدين عندي هو سيد الفضايل
قالت قسم بالله ماشفت رجَّال=
مثلك بغى حِجر السنين الأوايل
قلت الصحيح يصح لو مرت أجيال=
ركب الكدايش غير ركب الأصايل
ماهوب ذَنْبي ماعرفتي لك رجال=
ذنْب الزمن خــلا النشاما قلايل
ولا نيب لا رَجْعي ولاجيت خيَّال=
ولاشايلٍ سيفي وصايلٍ وجايل
إنسان متعلم ومن ناس عقَّال=
وفتحت عن نهج الحضارات فايل
أنا حضري مانيب نازل ورحَّال=
لو إن ربعي بين ضلعان حايل
وأنا في بيت ومكيـف جـنرال=
وأسوق سياره وعنـدي موبايل
ترى البداوه فعل ماهي بالأشكال =
والسَّلْم مانرضى عليه البدايل
وتبعت سَلْم العَوْد وأصبحت وبَّال=
ونقيت لي من الذود دق وجلايل
الطيب لأهل الطيب يبقى ولا زال=
وأعرف سلوم الطيب والشك زايل
وِلاشفت أنا عقال السناعيس ميَّال=
غصبٍ عليه عقال راسي يتمايل
السالفه ماهي بتمييلة عقال=
السالفه دمٍ بهالعِرق سايل
يابنت دام الدم بعروقنا سال=
كلٍ على عقله من الفكر شايل
لكن لوقلتي لي المهر بريال=
والله فلا أعنز عليك السلايل

صح لسان الشاعر عبد الكريم الجباري