‎ =‎

الصوت فالأبيات حلو انسجاعه=ليا صار في فعل الشّجيعين بالذّات

حتّى يجوز لمن تحرّى سماعه=بمخاطبة من يدركون الفهامات

بالمنتدى وإلاّ بصوت الإذاعه=أقول يا سامع كلامي بالأبيات

يا معلنن للنّاس جزل الشّجاعه=في ساعةٍ يأخذ بها الفكر صولات

ما هو غريب الشّجعنه والبتاعه=أبوك قبلك له بالأفعال طولات

بالفعل والحكمه وجزل البراعه=وسياسةٍ جات بجزيل الثَّمرات

والله سَخَر له ناس تسند ذراعه=قاموا مع الحاكم بجزل المهمّات

لين الوطن بالعزّ رفرف شراعه=والشّاهد التّوحيد في كل رايات

علامةٍ فيها الفخر والطماعه=يشهد لها مَقَام خمس الصّلاوات

قام المؤسّس لين حان انشلاعه=من حسبة الحيّين لعداد الأموات

وبقي الوطن نور يتلالا شعاعه=ما بين أطرافه بعاد المسافات

وتوارثوه مقدّرين اتّساعــه=أولاده وشعبه ببذل الجزالات

واليوم يا سلمان لكم البياعه=في مثل من قبلك بتوثيق بيعات

في منهج الّلي نَفْعِنا باتّباعه=والعدل سِيْدَ الأمن ما فيه شِكّات

الله كتب للمسلمين السّناعه=وألّف ما بين معايشين الصّراعات

واليوم يوم إنّ العدو طال باعه=وينبي زبير الرّافضي بالخيانات

متسلّعن بإيران لا أبوه راعه=وحنّا نملّ الصبر في بعض الأوقات

وبعدين وش يقصرك بالاندفاعه=وجيوشك الشّجعان في كل هَدّات

إرفع لهم صوتك بكل إرتفاعه=وأبشر بعزّك يا زعيم المغيرات

الرّافضي ما له نصير بنزاعه=اسمه دليل لنابذين النّزاعات

وتنّين باكستان طاب انطباعه=يأخذ على روس الطويلات قفزات

متحرّي الهدّه بصفّ الجماعه=يقول يالحوثي نجرّعك ويلات

واللي من السّودان مابه رعاعه=حطّ الكفن عصبه على الرّاس لفّات

وكل الخليج وما حوى به سْبَاعه=من الكويت إلى جنوب الإمارات

من طبّق القرآن شاف انتفاعه=نفعٍٍ من اللي فوق سبع السّماوات


‎ =‎

المشاركة الأصلية كتبت بواسطة سعد السمين (المشاركة 5967) صح لسانك يابو سلطان قصيده في قمة الروعة قلت وأجزلت يالجزل الله لايهينك وبيض الله وجهك تحياتي وتقديري لك

المشاركة الأصلية كتبت بواسطة معيض الضعيني (المشاركة 6193) مـن طبّـق الـقـرآن شــاف انتفـاعـه =نفعٍٍ من اللي فوق سبع السّماوات يا سلام سلام يا ابو سلطان لافض فوك وصح السانك واعتلا شانك وجزله من جزل يا والدي لاعدمناك ‎‎