بسم الذي يعلم خفايا عبيده=الخالق المعبود رب الجلالي
جلّ جلاله كل خيره نريده=ونرجيه عفوه يوم شد الرحالي
مطلوبنا عفوه ونخشى وعيده=هو الاله المتصف بالكمالي
ومن بعد ذكره بالعلوم الاكيده=علمٍ بعد دار الرشا بالمحالي
اول خبر مكتوب باعلى الجريده=فيه الطلب عاجل بليا جدالي
يعني طلب رسمي بلهجه شديده=السجن طالبنا ولابه مجالي
قالو ترا المطلوب ياللي تريده=نعطيك تفصيله بوجه العجالي
الاوله لازم تسوي قصيده=تسعة عشر بيتن ولازم اجزالي
وزودٍ على ذلك نبيها جديده=والمهله تحدّد ثلاثة ليالي
واللي يبا يعارض عقابه نزيده=ويبقى بسجنه والتشفّع محالي
قلت اكتفينا والخبر لاتعيده=قرب لي النوته وكيف الدلالي
ثم استلم مني بيوتٍ فريده=ابيوت ناقيها ولاهي هزالي
من فيض فكري والموارد بعيده=لاكنها احلى من القراح الزلالي
وقوة معانيها سيوفٍ حديده=بيدين شجعانٍ نهار القتالي
وتسلسل الفكره فنونه عديده=مبدا كسبته من دروس الليالي
شاعر ولي خبره بشعري واجيده=والقاف مايعصا ليامن طرالي
ياكم عسفت القاف والدرب سيده=من واقع الخبره ودربي عدالي
والفكر مايبخل علي برصيده=يوم الشرا والبيع بالسوق غالي
واكملت قافي والبيوت السديده=وحطيت توقيعي وختم اللحالي
=الشاعر ابو مناحي

المشاركة الأصلية كتبت بواسطة اصايل (المشاركة 5098) صح لسانك شاعرنا القدير مبدع ومتميز دمت بحفظ الرحمن

المشاركة الأصلية كتبت بواسطة رجآوي (المشاركة 5101) صحّ إيمانك وكفووو يابو مناحي

المشاركة الأصلية كتبت بواسطة اللحالي الغيداني (المشاركة 5130) شاعر ولي خبره بشعري واجيده والقاف مايعصى ليامن طرالي قول وفعل ياجنيه الشعر ؛ صح الله لسانك يابو مناحي تحياتي وتقديري للقصيده وشاعرها