البارق اللي مزونه جات صبّابه=اخيّله من عصير يلوح بمزونه
من يوم نشّا خياله والهوا جابه=يرعد ويبرق وروّع من يخيلونه
لمعة بروقه لشوف العين نهّابه=وليا تشعب تخالط شكله ولونه
الوان ضوّه بوسط المزن جذابه=مره ورا ثعلها ومرار من دونه
وخافت عيونٍ تخيله من تلهّابه=حتى السلامه تراها غير مضمونه
قرّب وراع الركايب حضّب ركابه=شايب وقام يتخثع وانكسر شونه
ومن السهر حلو نومه ماتهنابه=يوم المخيله عليه تشوفها عيونه
يدوي رعدها دويّ اتقال دبابه=من زلزلتها تهز الضلع وركونه
واهتزت الارض والضلعان واللابه=وروّع قلوب الاوادم يوم يوحونه
من هيبته كم قلوبٍ جات مرتابه=قدرة عظيمٍ جميع الخلق يرجونه
يرجون عفوه ولا احدٍ يامن عقابه=الحكم حكمه وتدبيره وذا شونه
ربٍ كريمٍ ماخيّب من ترجابه=ينشي مزون الحيا والبدو يتلونه
ولاطاح بديارهم ثم اصبحت غابه=تهيضوبه وكلٍ زانت ضعونه
وانا تهيّضت للبراق واعجابه=يبرق وسقت القدم خلفه علا هونه
من شان البّس قصيدي غالي ثيابه=واعطيه حقه من المقدار واصونه
والشعر طقيت بابه وانفتح بابه=وبكيفي امشّي الطاروق ولحونه
والبّْسه مشلحٍ ظافي ويزهابه=واصارحه بالحقيقه دوم ما اخونه
لانه وسيله يرد الطيب لاصحابه=والطيب جاني من اللي يستحقونه
مشعل ومنصور ناس الطيب واولابه=لن المثل من قديم اسمع بمضمونه
من قدّم الطيب حقه طيب يجزابه=لو قالو الناس صعب اقول ياهونه
الكل منهم بوجهي لاكرم اشنابه=مافيهم اللي يجوز العذر من دونه
قصيدهم يوم جاني فاحت اطيابه=وميقافهم من وفاهم ما يخلوونه
كلٍ لقيت اسمه المذكور بكتابه=مكتوب من طيب ذات ونفس ممنونه
لكن مني جزيل الشكر وابدابه=احروفه من الذهب ياتي وتقرونه
وربوعي آقول كلٍ كمّل انصابه=ومقدارهم معتلي وانتم تعرفونه
ولا اذم احد يامعارفنا ولا اغتابه=حنا نعرف الطريق ونعرف فنونه
لو يبلش الناس حنا مابلشنابه=تمّت وكلاً يشوف الدرب بعيونه