سلام مبدأ الكلام لسامعين الكلام=تحيةٍ مرسله لأسماع موحينها
بالحفله اللي عساها مثل وبل الغمام =لموجّه الدعوه وللي ملبّينها
والله يمسي بخيره للوجيه الكرام=لمشرّف الحفله وللي مقيمينها
بالديره اللي بها الحفله لماجد تقام=متميّزه بالكرامه من غيادينها
واللي مع الربع طيبه بالوفاء والتمام=الناس واجد وواضحةٍ عناوينها
الكل منهم تجنّد مجنده والحزام=في عون من رحمته تأتي لراجينها
وأنا لكل العرب منّي جزيل احترام=شعب الجزيرة وقيّاد متولّينها
اللي بمجهودهم وصلوا بلوغ المرام=من مبتدأ حاكمٍ شيّد قوانينها
والشعب مع قائد التوحيد قام بمقام=جهود ما نقدر نعدّد مضامينها
على كتاب الله المنزل لجلي الظلام=والسّنة اللي لسيّدنا وماشينها
عدّاهم العيب والله ما عليهم ملام=فعايلٍ يشهد التاريخ لأهلينها
والمعذرة عن قصوري طالبه بالختام=ما كلّ هرجه تبي تافي موازينها