اجاوب حمام الورق بالصوت والشله
 

^



‏ذبحني وليفي يا هلي والعيون تشوف
‏تدانيت .. عاده يحسب اني رفيقٍ له
‏
‏تحكمت بي واسرفت يا ضامر السرجوف
‏وعذبت روحٍ سلمتْك .. امرها كله
‏
‏يقولون لي طالت لياليك وانت تشوف
‏وانا اقول شيٍّ جايزٍ لي وطربٍ له
‏
‏دعوني بهذا الحال وانتوا هل المعروف
‏معافين ماتدرون عن صاحب العله
‏
‏وليفي عليه من الخشوف الدقاق وصوف
‏إلى ذار خشف الريم كنه وصيفٍ له
‏
‏إلى واجه اللي فاتنٍ صار عنده خوف
‏بعينه سيوفٍ تجبر النفس بالذله

‏نشف زرع قلبي واحترق عشبه المصيوف
‏ذواري هبوب الحزن صارت نفادٍ له
‏
‏طوال الرجوم اصبحت في روسها مكلوف
‏أجاوب حمام الورق بالصوت والشله
‏
‏‏يغني طرب وجروحي الخافية في الجوف
‏من اللي عيونه .. هِدْبها سود ومْظله
‏
‏" للشاعر عامر بن نوطان ، رحمه الله