منتدى اللحالي - الصاع بالصاع

بين القصيد وبين مفهوم الابداع
لوحـة فـكـر تظـهـر بصوره بديعه

كـثـر التـجـارب عـلمـتنا بالاقناع
آن الحـرار تروس مـاهـي تـبيعه

الطــبع يـغـلب مايفـيد التطـباع
غـيّـر جـبال و لاتـغّـيـر طـبـيـعه

رجلن. ليامـنه.فـزع.يفـزع. بسـاع
ورجلٍ على الفزعه تقل فيه ميعه

المـرجـله يبـغـالها لسـان وذراع
لاتـشـتـم الـعـالـم بـلـيـا ذريـعـه

مـانقـبل العـيله لوصـدورنا وساع
ولانطـوف الزله لاصـارت شـنيعه

خـل اللكاعـه وش تـبي بالتلكاع
بـذات لاجـيت الرجـال اللكـيـعـه

اقضب لسانك عن مدورة الاطماع
مـاكل عـلمن لاسـمـعـته تذيـعـه

النفـس آمـاره والانسـان مطـواع
بس الـعـقل مـاكل شـين يطـيعه

تـجـارب الاجـواد تـشـرى وتـنباع
بس الظـفـر بالتـجـربه مـانبيـعـه

لاصرت راس و ساس لاتنزل القاع
اكفـخ جـناحـك في عـلو الطـليعه

محدن كسب حب الاوادم بالاجماع
حتى الرسول اللي هدى ل الشريعه

لاتبلش بعـمـرك تـرى العــالم انواع
والناس يامـتـواضـعـه ياوضــيـعـه

لاتحـتري من ناقـص الراي الاسناع
من شـاور الغـاوين يبشر ب ضـيعه

العـين سـدّ العـين والصـاع بالصـاع
لايرهـبك عـوي السـباع المـجيـعـه

الذّيب مـايـاكل من الجـيـف لو جاع
شبحـه بعـيد وعـظم ساقه سريعه

خـلك مـع الاجـناب مـحـزم و فـزاع
وخـلك ل بن عـمك حصـونن منيعه

وليا لحقك الضيق من بعض الاوضاع
هـلل..وكـبّـر..وادع..ربـّك. و طـيـعـه

لاتشتكي..للقـوم..وتزيد..الاوجـاع
يضـيق صـدر ولا تضـيق الوسـيعه

حـوادث..الايام..مـادونـهـا..شـراع
تبّكي الشـيبان مـثل الرضـيـعـه

شعرن ليامن قيل تطرب له اسماع
وشعـرن يعّـل ولايجـمـل صــنـيـعـه

آعــيدها من باب تكـريس الابداع
مـاكل عـلمن لاسـمـعـته تذيعه

منقوله

لم نعرف شاعرها بعد وأوجتها هنا؛؛ لجزالتها صح لسان شاعرها