من لا يقاسم فالطعام الذيابه = يموت جوع ولقمته مشتهيها
ومن طق باب الناس ينطق بابه = و يذكّرونه في علومِ نسيها
ومن لاتفقد كل جابه وجابه = لا جاته الزلات يصبر عليها
ومن لايثمن فالمجالس جوابه = الطيّبه يبطي وهو يحتريها
و اللي يضيع فالملاقا ركابه = يجلس ويتركها لمن يمتطيها
ومن لايصد القوم ماينغزى به = والنايفات يموت ما يعتليها
واللي يسولف في ظهور القرابه= اخير منه اللي تحني يديها
واللي يقيّل في بيوت الخرابه= لو تطرده منها يروح ويجيها
وان مات والا عاش محدٍ درى به= يجهل علوم الطيب لو يدعيها
ومن لايهاب الناس محدٍ يهابه = ويرضى بها من هو لغيره رضيها
واللي يحسب الرزق يؤخذ نهابه = اليا انهبوه القوم لا يرتجيها
ومن لايفصّل فوق جسمه ثيابه = ياشين لبستها بعد يشتريها
والفعل يفرق والملامح تشابه = ولا للمواقف غير من يحتميها
واللي كلامه سيف صدره نصابه = و قدام ينطق كلمته يحتسيها
وكلن تسجل سيرته في كتابه = اما لها و الا تسجل عليها

المشاركة الأصلية كتبت بواسطة اصايل (المشاركة 10668) أبيات من ذهب رحم الله الشاعر وبيض الله وجهك ع النقل الرائع أحترامي

المشاركة الأصلية كتبت بواسطة دحمان-الحاج (المشاركة 10670) فعلا يا ابو سلطان كل بيت من هذه القصيدة درس مستقل من دروس الحياة رحم الله الشاعر وتسلم يمينك على هذا النقل الجميل✏❔