المجلس اللي ماتقدَّر بمركاه= تجلس على عزّ وتقوم بمعزَّه
خلّه عساه يرمِّم الوقت مبناه= حتى يصير بجلسة الركن مزَّه
( والصاحب اللي ماتبيَّن لك أقصاه= قبل تجور أيامك السود هِزَّه )
أمّا يجي هدّاج وإلا تعدّاه = للي يعزّك وانت مثله تعزَّه
والجانب اللي ماتونَّس بطرياه = خله عسى بقعا وحبله يحزَّه
اللي ماهو وقت اللوازم بليّاه= وش لك بـ عِرق الحنظلة لا تغزَّه
اللي ماهو مزبن وتدخلك يمناه= يا عِلّ صلفات الهبايب تدزَّه
اِتعب على اللي لاتضايقت تلقاه= علمه على روس الطوايل ينزهِّ
والبندق اللي رميها دون مرماه= تِكلا مغرّه والهدف ماتخزَّه
اللي ماهي من غالي السوق مشراه= ماتستــوي للي ينومـس مفــزَّه
والعمر ماهو شين أقصاه وأدناه= مثل السراب يضيِّع اللي يلزَّه
الليل مسرى الذيب والعفن مضماه= فصيــلة البومة دجاجة و وزَّة
أما الرِّدي لو زان يرجع لمرباه= أما يبيع الكلب وإلا يجزَّه
نعطيه ضرس الذيب والناب ناطاه= نكسر جناح عقاب والنار شزَّه
الذيب راس الميِّته مايتعشَّاه= والحُــر في روس المراقيـب عِـزَّه
نِمدّ يمنى الطِّيب وإن صدّ شفناه= نعطيه من حبل المدى ما نلِزّه
والشارب اللي طال من فعل يمناه = حِبَّه على خشمه وراسه وعِزَّه
البارحـة ياطــول مسراي طولاه= يكزّنـي هاجـوس قلبي و اكـزّه
أرقبت مرقابن عسى المزن يدْلاه= عمرِّدن صفح الهـوى مايهــزَّه
أحثّ رِجـلي للنّبـا وأتمنــاه= هاك الطويـل اللي براسه معزَّه
نرقا سنام المجد واذبح لأبو شاه= وضحا سنامن للنشاما نغزَّه
ناخذ شوايا الذيب ونترك بقاياه= للتّبع والمتبوع واللي يلــزَّه