يالله يالخلاق قسام الارزاق=يامنشي بروق الحيا بالمخايل
يالواحد المعبود ياراعي الجود=انت الكريم ولا لجودك مثايل
ماخاب من يدعيك مخلص ويرجيك=يرجيك عفوك مايدور بدايل
هذا الزمان يروع بالشكل والنوع=في كل شكل ونوع شفت الهوايل
وانا على الميثاق لو الفضاء ضاق=ابقى على مبداي ماني بعايل
والحق مرهف حد بالمزح والجد=حدّه مثل حد السيوف الصقايل
يعني على المكشوف والعالم تشوف=ابعد عن الزله بكل الوسايل
واصحابي الغالين ماهم رديين=ماني منقّص في عيال الحمايل
وانكان ابو سلطان يالربع شرهان=ماقلت غير الحق ياهل الفعايل
لكن ياجزّاع يالشايب مطاع=لو تقدح زنودك بروس الفتايل
كان الزعل عدّاك لي مد يمناك=هذا الكلام اللي بجد وصمايل
لو العلوم مزوح والوضع مشروح=بحول ربي يعتدل كل مايل
وكانك تبي معذار ماني بغدار=مني لك المعذار والراس طايل
وابشر بمايرضيك والله يحييك=ماضاع بين الناس فعل الجمايل
العرف ماله حد يا امعرّب الجد=وانته تدل ولاتبي لك دلايل
هذا كلامي جاك عاني وينصاك=ياذخر ربعٍ يكسبون الاوايل
باهل الوفاء والطيب لايلحقك ريب=وانته بعيد انظار والشك زايل
هذا ترا القانون والناس يوحون=وانته تعرفه يا عريب السلايل
وبنهاية الابيات جزل التحيات=مني هديه عد وبل المخايل

لو جابت الأخلاق من حلو الأذواق=بالّلي من الأعماق عمق السّلايل
من فزعة المعـبود في كل مجهـود=من ياسر الماجـود بذل الحصايل
في ما ترى يجديك من عند والـيــك=من ما يـديـنـك في بلـوغـه كفايل
لا تستهـين شروع في كل موضوع=خلّك صويب سنوع عن الجهايل
خلّك على الميثاق في سمح الأخلاق=لو إنّ وقتك عاق بعض الكمايل
مـا كـلّ حـدّ بـجـدّ يِـنْـبِـي عـن الصّد=لـو فـوح عـود النَّد عبر الخلايل
يعـني بعـيد وْلوف عن غير مألوف=يْرِيح بالـك من جـمـيـع الشّكايل
وأصحابي الغالين ما هم غـشـيـمين= وجـمـيعهـم من طـيـّبـين القبايل
وإن شفـتني شرهان مانيب غـلطان=ما قـلت غـير الصّدق ما به خمايل
لـكـن وأنا جـزّاع لــلـحـرّ مـشــلاع=ومـشـالـع الأحرار ما هي قـلايل
ولا به زعـل يـخـفاك من غير لولاك=لكن عـلى لـولاك سـقـنا الزّمايل
لو الحْمول شحـوح والوقـت لاحوح=ترى القـلوب نصوح ما به غلايل
ولا فـيـه لـلـمـعـذار ما يوجـب إنذار=لجل القلوب طهار ما هي غمايل
والّلي عليّ أهـديـك في مـا يـهـنّـيـك=رضاي من رضاك كمل الجزايل
والـعِـرف رمز الودّ مـتـمـدّد الـحـدّ=بـيــن الـنّـفـوس العايـشه والقتايل
وكـلامـي الـّلـي جـاك رَدٍّ لـمـبـداك=وأنـت الـفهـيم بقاصرات وطوايل
يا وارثـيـن الـطِّـيب وفـتل الأشانيب=فـي كـل مـا يِنَّال عـن كـل طـايل
يــا نـاصـر الـقـانـون في مـا تـقـولون=يابـو مـناحي يا جـزيل الـحـصايل
أرســلـت لي أبيات ما هـن بسيطات=وأخذت فـيهن وقت أقرأ واسايل
من واقع الاحساس في هرجة النّاس=يصدع بلا مقـياس حـلـو الـعـسايل
ومـن لا يجـيد الـقاف في كل مـيقاف=بعـده عن المحساف خير الفضايل