الوسم توّنّه بدا بالوقت يالسيل النّحوت=وبدت تجاهيز الرّحال اللي عديد اوفودها
واشوف راعين البحرقامويحوفون اليخوت=فالبحرالاحمر والهدايف غامضن مقصودها

الله يعجّل بالحياء للدار من بعد الوقوت=يالفاهم اللي تدري بنقص العلوم وزودها
واضح هدفهم والهدف مدروس لايمكن يفوت=واللي مضا متعادله بيض الليال وسودها

ياحي من يفهم علوم اللي يقالب جالبوت=في غبّةٍ قامت بها الامواج من مزهودها
متزامناتن في ليالي وقتنا أيّام الوقوت=مع الّليالي في زمان اليوم كيف وعودها

ترا الجراد اللي تناول غصن والغصن امحتوت=اللي حداه الجوع والشجره مريّش عودها
طال انتظار المنتظر والناس في وضع السكوت=لين انفجر بركانها والصبر باح سدودها

نعم به محامي عن المرمى بوجه اللي يشوت=وانا مع الجمهور أشوف اللعبه اوراصودها
سمعت تصفير الحكم وأشهاره لحمر الكروت=لكن ماني مستوعب اللعبه واعرف أفنودها

كلٍ يدور حقه المشروع قبل انه يموت=واللي يوقع باتفاقيه رضي ببنودها
صار التحكم بالبشر مثل التحكم بالريموت=وتدري عن اللعبه ليامنك قريت عقودها

عرفت حالي يوم جن في نجد هافات الفروت=يوم العرب تاخذ مع الفرجات جزل سعودها
والفلجه اللي جنب فلجه لو تشكبنها البتوت=صارت تقوم بحاجة اللي يذتري عن نودها

هذاك يوم انك تمشّى بالفياض وبالخبوت=يوم العرب سرّه وقرّه والسلام يسودها
اليوم اشوف الفرق حتى بالمشالح والبشوت=وانته خبير ليا تخالط ملحها وبارودها