عبر الزمان اللي تسابق لياليه=ياعيد سلم لي على روح غايب
سلام من هاجس محبه ومغليه=وقل له تراني من غثا الوقت شايب
سلام تعزف نبرة الحزن مافيه=عليه من نبض المشاعر ندايب
اجمل تحيه زفّها بين اياديه=فيها الغلا مع جارح الدمع ذايب
ذكرتني يالعيد وقته وماضيه=ذكرتني ساعة نزول الوايب
يالعيد قلبي حارق الوجد يكويه=من يوم مارزو عليه النصايب
حاولت نسيانه ولاني بناسيه=ذكراه بارق والخواطر سحايب
بعطيك من وصفه مواري واحليه=مثل العقاب اللي عطيب الضرايب
حلو المحيا مايمله مخاويه=دايم يذكرني بوصل القرايب
تبعد به الايام عنّي وانا اتليه=رحال فوق ظهور سود الركايب
تسريبي الذكرى على درب مابيه=واسري وانا من موحش الدرب هايب
كنّي على مركب بعيده شواطيه=تلعب به امواج البحر والهبايب
كم لي وانا اخفي مابقلبي واداريه=واشيل في صدري لهود وصوايب
واعيني اللي هلت الدمع تبكيه=وانا ادري ان الدمع ماهو بثايب
مشتاقله شوق المسافر لاهاليه=مشتاقله شوق اللقا للحبايب
اودعته اللي يعلم الحال وارجيه=يغفر لنا الزلات جزل الوهايب