|
ياراكب من فوق حيل محلات
قرأت في جلست الامثال الشعبيه والحكم هذا البيت للشاعر صالح بن سند الحنتمي الحربي رحمه الله
وتذكرت القصيده ونقلتها لكم لأنها كلها حكم البيت هوالي يقول ياما على الجاهل يفوتن الأفوات * وياما على العاقل تصير البلاوي والقصيده كامله هي: ياراكب من فوق حيـل محـلات=مترفعـات مبرمـات عصـاوي يشدن تخضـاع البنـي العفيفـات=على المزيـن يجدعـن المـزاوي القلب لابـده يهوجـس بحاجـات=والبعـد والله مأيـرد الشـقـاوي تعبروا ياأهل القلـوب الفهيمـات=متعرضيـن للخطـر والاهـاوي ياما على الجاهل يفوتن الأفـوات=وياما على العاقل تصير البـلاوي لاصار ماتاخذ امورك سياسـات=يصير عقلك والهبـال متسـاوي راع الحساني مأيجازى بسيـات=وراع السخاء حبله طويل رهاوي ورفيقك اللي دايم الـدوم شمـات=بيعه برجوى الله وثيق العـراوي والقبر صندوق العمل بيت الاموات=ترصد على جالـه بـدو خـلاوي دمتم بخير |
|
دمت بخير يابو فهد وهذي من هقواتنا فيك يابن حرب
نعم مثل ماتفضلت و صالح بن سند الحنتمي كثير الناس من عديد القبايل يعرفونه والرّجل له قصايد جزله بغير قاصر بالجزلين من كل القبايل ؛ اعتقد ان اكبر اولاده جزاء الشاعر المعروف / الله يرحم الشاعر صالح بن سند واخوانه المسلمين ابو فهد انت ذكرتني في ماقد سمعته عن هذا الشاعر وواحد قيل انّه مطيري شاعر قيل ليّ انهم وردو على مارد توافقوا عليه مادري يعرفون بعض من قبل أملاء المهم ان صالح معه فرت وايت / كلمة وايت بالانجقليزي تعني ابيض وحنّا نقول للصهريج وايت ؛ تانكي ماء ورفيقه معه جمس تانكي وتقاصدوا وهم على المارد على ماقيل لي ولكن قصيدة قبيله ماعرف منها شي حيث الرّاوي قال ماحفض منها شي المهم انّه يمدح الجمس وصالح يمدح الفرت منماسمعته من قصيدة صالح يقول ماخبلك ياللي تسب الفرت غشّاشي تبي هل المرجله ماعاد يشرونه او انت ماتفرق الفاطر من الحاشي ولاتفرق الشّاكله من قوطي التّونه الى ان قال الجمس حدّه ثمان شهور درداشي وعقب السنه طاح زيك الجمس وجفونه ياليت نلقى من يعطينا قصيدة قبيله اللي هي السّبب وباقي قصيدة صالح / حط بالك يابوفهد وبنفس الموضوع اللي تقدر عليه شاكر ومقدّر مجهودك يايوب البلاجي |
اهلا اصايل شاكر حضورك وإشادتك بالمنقول........... |
اهلا وسهلا ابوسلطان نعم كماذكرت الشاعر صالح له قصائد جزله وقيل إنه نظم الشعر وهو صغير أما القصيده التي ذكرت قصيدة الفرد هذي اول ماسمعتها جزمت انها ليست له لعدت اسباب منها إن صالح رحمه الله توفي عام 1381هـ تقريباحسب روايات الشيبان وكان مايعرف السيارات ثانيا قصيد صالح يتميز بالجزاله والقوه من غير قصور بصاحب القصيده السابقه واللتأكد تواصلت مع ابنه عجاب صالح موجود في الرياض وأكدلي أن هذه القصيده قصيدة الفرد والجمس ليست لأبوه ولايعرف عنها شي شاكر متابعتك وهتمامك بالشعر الجزل والشعراء القداما |
مشكور على الايضاح يابو فهد لاهنت
وقولك عن تاريخ وفاته خير دليل ومن ابنه ايضاء دليل قاطع ولاشك فهو ادرى بأبيه الله يرحمه واموات المسلمين مشكور يابو فهد ولاهنت يالغالي |
الله يرحمنا وأمواتنا
قصيدة رائعة بمعانيها سلمت يا أيّوب على مشاركتنا إيّاها والله يعطيك العوافي . |
الله يعافيك اخت رجآوي إشادتكم ومتابعتك انتِ ولأخوان هي التي حفزتني للبحث عن قصائد عمالقة الشعر القداما مثل صالح الله يرحمه وقد وجدت له قصيده اخرى في احد المواقع كنت احفظ منها بعض الأبيات يقال إنها بعد وفات زوجته وكان لهاابن رضيع : ياهل الركاب اللي على السج والسير بالله عليكم لين تافي وصاتي أنتم ونايا والركايب مناحير فنجال بنن ماعليكم فواتي قم ياخطيب وهجر الخط تهجير هات القلم والبسمله هي بداتي أونس بكبدي مثل دق المسامير ورعن يحوم به على المرضعاتي وقله ترا أمه دخلوها الحوافير وصكن عليها لحودها المضلماتي بعد هذا البيت هناك ثلاث أبيات مفقوده وسأبحث عنها الى أن قال واللي يتيه الدرب يعط المعابير وهاذي طواريق العرب بيناتي وروس الخزايز ماتلاد المخاسير متفرقات وبينهن افتخاتي كذالك قصيده اخرى لها موقف طريف سمعتها من شايب من ربعنا سأزودكم بها متى ماسنحت الفرصه . .................................... دمتم بخير |
الله يعطيك العافيه يابو فهد ع المجهود وبأنتظار ماتقدر عليه
|
السلام عليكم
كنت اقرابهذه الجلسه وجدت اني قدوعدتكم بان ابحث لكم عن قصيده للشاعرصالح بن سندرحمه الله وعتقدني وفيت بوعدي لكن ماوجدتهاهنا يمكن في مكان ثاني ان كانت مكرره احذفوها...... .......................وهذه القصيده كان فيهانوع من الطرافه كان زمان اول الواحد اذا ار أن يتزوج يقدر يشوف اللي يريد الزواج منهاعلى الطبيعه مثلا يشوفهاوهي مع الغنم اوتجمع حطب ﻷهلهااوعلى الماءتروي قربتهاولافيه مانع ان يسلم وتردعليه السلام وممكن يسألهااسئله يشوف ردها ويختبرذكائها ومنطقهاوهذاشي طبيعي قدام الناس مافيه شي خفي ..ماهوزي هالحين شختك بختك كرتون مغلف انت ونصيبك...المهم كان فيه واحداسمه زيّادحاط عينه على وحده يبي يخطبهاوقال في نفسه لازم اشوفهاوكلمها قبل الخطبه امرهاعلى الذلول عابرسبيل وسلم وسألهاعن بعارين ضايعه ولاغنم المهم يبي يسمع كلامهاهي كانت م الغنم هو فكر اللي حوليهاالبنات والعيال رعيان لكن المفأجه انه وجد صالح قريب منهم معه بندقه يتصيد وهم متجهين للماواردين وزيادعاكس السير ناطح الورديوم شاف صالح سلم عليه درى ان الخطه كلها فشلت وحاول يدور اي اعذر قاله صالح وين يازياد الناس وارده ونت عاقبهم قال ابدوالله البارح ضيعت عقل البل بالمكان هذا وجاي الدورهن صالح ذكي ماتمشي عليه قال وين يازياد عنيت المطيّه وين يازياد غادلك اذهوبي ذاهبتك عقال مع سبع اللفيّه في مجامع درب مع كل الدروبي تحسب انّي جاهلٍ تلعب عليّه مادريت اني على مثلك لعوبي ماهم سهلين الشيبان.... هذاماحفضت من القصيده والمعذره على الاطاله في المقدمه...... |
| الساعة الآن 04:35 AM |
Powered by vBulletin™ Version 3.8.7
Copyright © 2024 vBulletin Solutions, Inc. All rights reserved.
